弄堂里个宁波阿娘

扫码听语音

文/秦来来

阿拉楼下厢房间里住了一位宁波阿娘。因为儿子死得早，后来伊领了一个小囡，阿娘勿拿伊当儿子，而是当孙子。搿个小囡属龙，阿娘就拨伊起名叫小龙；阿娘娘家姓王，搿个小囡也就姓王了，大名就叫王小龙。王小龙、王小龙，阿娘是望伊早日成龙！

侬覅讲，迭个小囡倒真是老争气嗰，小学毕业，考进华师大二附中；高中毕业，保送清华大学；大学呒没毕业，又由学堂保送伊出国留学。从小学到大学，学费全部国家负担，所以阿娘一直搭小龙讲：“阿娘呒没文化，侬有今朝，合众侪是靠国家，侬覅忘记！”

前两年，小龙回国了，搭阿娘讲，伊学个专业是火箭工程，现在要到北京工作一段辰光，叫阿娘自家保重！

阿娘晓得以后，搿种开心样子，讲勿像、话勿像。只要电视新闻里看到卫星上天，第二天碰着人家，勿管认得勿认得，伊就要搭人家讲：“倷看见口伐，昨日电视里，阿拉卫星又上天来口来。”

我总归要搭伊寻寻开心：“上天么哪能呢？”

“搿个火箭，阿拉小龙造嗰！火箭，侬晓得口伐。就是屁股下头点火。嘭！到月亮去口来；嘭！到火星去口来……”

“葛末阿娘，接下来‘嘭’到啥地方去啊？”

“我还呒没‘嘭’，侬瞎‘嘭’有啥‘嘭’头？”

“对对对，搿个‘嘭’只好侬来‘嘭’；葛末接下来倷孙子搿只火箭要放到啥地方去啊？”

“嘭！搿记放到太空宾馆。”

“啊？太空也有宾馆？”

“咋会呒没？旧年10月份，‘嘭’一记，就有三个人被送到太空宾馆了，当中还有一个小姑娘，伊还辣太空宾馆里帮小朋友上课。伊拉辣上头住了六个号头，搿个勿是宾馆是啥东西？”

宁波阿娘拿太空舱当宾馆，错倒也勿好算错。

前两日，小龙来信，要接阿娘到北京去，趁伊放假，陪阿娘到北京白相一趟。阿娘开心煞了，我搭伊讲：“阿娘，我去帮侬买火车票，现在高铁乘起来老适意嗰，只要6个钟头就到北京了。”

“6个钟头？介慢啊。”

“葛末，我帮侬去买飞机票，2个钟头到北京。”

“2个钟头？还是太慢。”

“2个钟头还慢，搿是呒没其他办法了。”

啥人晓得阿娘笑嘻嘻搭我讲：“啥人讲呒没办法；我孙子勿是造火箭嗰么，我就乘火箭去！”

讲完，阿娘笑得两只眼睛也寻勿着了。