上海葱油饼

文并图/沈一珠

辣屋里个辰光长了，自然呒没直接辣外头来来去去便当。譬如讲，买了两箱葱油饼，本生侪是隔日就可以到嗰，结果迭趟等仔将近一个号头，终于来了，还只有一箱。开始还以为快递落脱一箱，打电话寻着快递小弟。小弟讲，肯定只有一箱。

再打电话到卖家，对方一查：抱歉，是少发了一箱。刚刚想叫伊拉补发一箱，结果对方直别别回头：退侬钞票。

想想，或许是疫情期间，产量搭勿够？运输跟勿上？

讲到此地，还有一桩事体。有趟仔明明买个是上海葱油饼，发货地也讲是上海。结果，包装盒浪向写个产地是西安。当然，伊拉也说明，上海有仓库。所以，交关买回来个上海葱油饼，实际浪根本勿是辣上海做嗰。

想想，做点葱油饼，也勿是啥特别难个事体，费点工夫而已。关键是，现在阿拉有得是辰光呀。

用料：面粉、鸡蛋、素油、盐、香葱，还可以准备一点点霉干菜。

做法步骤：

1.四大勺面粉，一半一半分别用冷水、热水拌成絮状，我欢喜辣冷水一半面粉里加只蛋，最后再倒点油进去，一道掿成一只面团，摆了镬子里，醒半个钟头；

2.半小碗面粉，加稍许盐，加热油拌匀，做成油酥；香葱汏清爽，切成葱花；霉干菜浸泡后，也切成末末头；

3.拿醒好个面团搓成长条，切成N只小刀切，继续摆镬子里盖好盖头，防止面团表面干脱；

4.拿一只面团搓圆，擀成圆形薄片，再拿油酥辣薄片浪向涂满，撒葱花、霉干菜少许，轻轻卷起，成一长条，盘成圆饼形状，再拿圆饼擀成薄饼。手势要轻一眼，尽量勿要弄破，两面刷点油；

5.拿所有做好个饼，平摆辣保鲜膜浪，层层隔开，再放平摆进冰箱冷冻抽屉。想吃个辰光，拿出来，平底锅里煎到两面金黄，就好吃了。煎个辰光，可以勿放油。