脚印里个春日童话

微信扫码看视频听钱程沪语朗读

◆ 周钰栋

春暖花开，桃红柳绿，是踏青春游个好辰光。我就会想起小辰光同邻居小朋友一道步行去西郊公园春游个事体。

埃歇辰光我住辣了杨浦区，西郊公园对我来讲是一个斜气神秘个地方。据说西郊公园里向有威风凛凛个狮子老虎，有体型庞大个象鼻头，还有活蹦乱跳个猢狲，对阿拉搿点小朋友个吸引力是斜气大个。不过当时阿拉呒没钞票，勿好乘车子去白相，只好靠两只脚走过去。

按当时个说法就是乘11路无轨电车，两个“1”代表两条腿，也是蛮形象个。

哪能走呢？路勿认得呀！我就拿出一张上海地图，搭几个邻居小朋友一道，一门心思要寻到通往西郊公园个路线。经过反复商量，阿拉决定尽量走直线，减少迷路个风险。接下来我拿出一本练习簿，开始设计行走路线：从控江路出发，走到大连路，再转弯到长阳路、长治路，过外白渡桥到外滩，然后沿牢南京路走到人民广场，沿西藏路走到淮海路，一直往西经过交通大学，最后沿虹桥路再往西走，就可以到西郊公园了。

路线设计好以后，阿拉再回去征求家长个意见。一开始啊，伊拉侪勿同意阿拉去，讲路忒远，怕阿拉出事体。阿拉就请了一个大阿哥作为安全保障，陪阿拉一道去。最后爷娘勉强答应了。

出发搿天，早浪向4点钟，天还呒没亮，阿拉就出发了。每个人书包里向侪装了两块饼干、一瓶冷开水、一支笔、一本练习簿。为啥要带纸笔咾啥呢？因为阿拉到西郊公园白相好还要原路返回，所以走一路就要记牢一路经过个商店、菜场、电影院。特别是过十字路口转弯个辰光，要记牢四只转弯角子浪向个房子是啥个样子个，搿点物事侪是阿拉回来个路标。

等按照事先设计好个路线，一步一步走到西郊公园，已经是吃中饭个辰光了。虽然只白相了两三个钟头就要开始走回头路，但是大家斜气开心，有了第一趟个经验，阿拉决定下趟还要再来。

等到回到屋里向，附近其他小朋友听说阿拉是自家走到西郊公园个，侪眼热得勿得了，纷纷表示等秋游个辰光，也要到西郊公园去。我一听，马上抬起头，拍拍胸脯，老自信个讲：“阿拉认得路个，到辰光带大家一道去。”不过其他小朋友勿买账：“啥人要侬带啦，阿拉自家也会得去个呀。”

再后来，只要到了适合春游、秋游个日脚，或者暑假里向，弄堂里向个小朋友侪会得三五成群结伴而行，自家设计路线，一路浪讲讲笑笑走到西郊公园去白相。直到现在，只要搭老邻居一道聚会，总会得讲起当年一路浪向发生个趣事，引出了勿少开心个回忆。