鲁迅与海京伯马戏团

◆储有明

马年春节期间，上海马戏城打破剧场边界，拿马戏表演带到公共空间，七天里向演了五十几场。讲到马戏表演，鲁迅先生1933年辣《申报》浪发表杂文《动物训练法》，是伊看了当时辣上海演出个德国海京伯马戏团，有感而发。鲁迅个独养儿子周海婴辣了回忆录里也专门写到过搿趟海京伯马戏团个演出。

当年个“海京伯”，是全世界拥有狮子、老虎、海狮、棕熊、大象等大型动物最多、演出规模最大个马戏团。1933年，伊拉租了一艘万吨轮，拿全部演员、动物、道具、服装，亨八浪打装上船，到世界各地巡回演出。

轮船靠辣黄浦江码头，起重机、大吊车拿装着大象头、狮子、老虎、棕熊等猛兽个大铁笼，从轮船浪吊下来个辰光，记者们又拍照又报道，引得整座上海城轰动。当时上海个《新闻报》，立马以《舶来马戏“海京伯”，狮虎猛兽动申城》为题登了报道——百年前个上海人，侪拿进口个东西喊作“舶来品”。

当时上海最豪华个大华饭店，因火灾拆脱了，辣了戈登路（现在个江宁路）搭静安寺路（现在个南京西路）交界个地方，空出一大片地，马戏团就辣了搿块空地上搭了个专门演马戏个大棚。棚顶有四五层楼高，好表演空中飞人；舞台是圆个，观众席呈360度阶梯状排开，勿管从啥角度看演出侪清爽。

马戏一开演，16个男女驯马师穿了金光闪闪个骑士服，英姿飒爽骑辣了16匹披了流苏绶带个大白马上，鱼贯而出；还辣了驯马师个指挥下，跟着音乐节奏变队形，步伐齐齐整整，当场就惹得全场观众欢呼叫好！接下来，萨米人、努比亚人，结合驯麋鹿、驯骆驼，做了民族文化展示。整场演出，由好几个红鼻头小丑个滑稽表演串场，猛兽表演个紧张，搭配小丑个搞笑，有张有弛。尤其是海狮顶球、狮子驾战车、猛虎踏三轮车、大象吹笙斟酒搿点节目，直接拿演出个气氛推到了顶。

演出当中，驯虎师施威德，结合猛虎钻火圈搭骑车载人个表演，讲伊拉是哪能靠“爱个力量”驯化猛兽个。鲁迅先生本来想带海婴一道去看马戏，可海婴那辰光才四岁，年纪太小，怕小囡被猛兽吓着，就搭许广平两家头，等海婴睏着了，偷偷交去看个。鲁迅先生对海婴向来呵护有加，伊还写过一首诗：“知否兴风狂啸者，回眸时看小於菟。”意思就是：老虎虽然凶，吼起来震天响，可对自家生个小老虎，也斜气温柔。

当年海京伯马戏团个演出，轰动了整个上海滩，报纸浪天天侪有相关报道，门票也是一票难求。就连国学大师钱锺书，也辣了文章里写到过“海京伯”。因为演出里，有驯兽师吹口琴指挥大象表演，搿一下，永安、先施等四大百货公司个乐器部，口琴直接卖到断货。口琴演奏家石人望抓牢迭个商机，趁热成立了“大众口琴会”，报名学吹口琴个学员，直接爆棚了。