秋食蓬蒿正当时

做人做事体只要一起贪念就已经输得汤汤滴了。 沈一珠 绘

◆ 沈一珠

秋风一吹，露天种出来个蓬蒿菜就要上市了。可惜只有两三个月，欢喜蓬蒿菜特有香气个人，常常还呒没过足瘾，一过十二月，伊个季节就戛然而止。后头市面浪虽然仍旧看得见蓬蒿菜，但是侪是大棚里向种个。想想也对，迭种松松软软、娇滴滴个叶菜，实在扛勿牢冰霜雨雪个折腾。

上海人最平常个吃法是清炒。一斤左右，叶片肥糯滑嫩，几乎呒没梗。清水泡一歇，汏干净，沥干水分。油镬烧热，倒进去翻两记，撒一眼盐；欢喜甜鲜口个，可以加一眼糖，就好盛出来了。蓬蒿菜水汽足，看上去蓬蓬松松一大把，下锅一炒就缩脱，盛出来浅浅一小碟，还带点汤水——让人想起总有人容易上当受骗，结果血本无归——侪是成年人，要想明白个是，做人做事体只要一起贪念就已经输得汤汤滴了。

现在有种新潮饮食理念叫Living Food，提倡吃天然蔬果、果仁、发芽谷物，食物加热温度勿超过48摄氏度，再搭配冷压健康油脂，帮助营养吸收。所以蓬蒿菜个吃法也跟上潮流，开水里烫一烫捞出来，淋一眼油醋汁，搛一筷尝一口，好比夏末走过刚刚割过草个小路，清新气息沁人心脾。

最近还看到一种更加简单个吃法：水里撒点盐烧开，蓬蒿菜放进去烫一烫就捞出来，直接吃。据说搿种吃法是一个朋友花铜钿从一个健康课程学来个。吃之前还要拍照片传拨老师，再动筷子，仪式感足得勿得了。花钞票学返璞归真，也算有所收获。唉，当吃物事变成一种时髦，看上去像是解脱，实则又是一种束缚。

勿过，多吃应季蔬菜，既是尝鲜，也勿辜负大自然个馈赠。我手头有本书，焦桐写个《蔬果岁时记》。书里讲到唐三藏师徒取经，除掉豹子精之后，救了一个樵夫。樵夫感激万分，备了满满一台素斋。原来《西游记》里，除脱三打白骨精、勇斗牛魔王搿些大场面，还有迭样鲜美个素菜描写。原文蛮长，摘抄一小段：“嫩焯黄花菜，酸齑白鼓丁。浮蔷马齿苋，江荠雁肠英。燕子不来香且嫩，牙儿拳小脆还青。烂煮马蓝头，白熝狗脚迹。猫耳朵，野落荜，灰条熟烂能中吃；剪刀股，牛塘利，倒灌窝螺操帚荠。碎米荠，莴菜荠，几品青香又滑腻……斜蒿青青抱娘蒿，灯娥儿飞上板荞荞，羊耳秃，枸杞头，加上乌蓝不用油。”

《西游记》我看过好几遍，记牢个侪是三打白骨精、勇斗牛魔王搿些波澜壮阔个情节，偏偏忽略了迭种野菜清香个清雅文字。唉，读书学习，包括跟风追时髦搿些事体，千万勿好囫囵吞枣。