过节要忙才扎劲

文/侯宝良

兔年春节已经过去了，老朋友阿三跟我讲：“现在过年呒没劲，我做啥事体侪兴趣勿高，看侬倒是忙忙碌碌蛮扎劲。”我朝伊笑笑：“今年疫情情况勿同，我也简单了。”想起来，近些年交关人侪感觉过年呒没味道，勿像老里八早过年有一股浓浓的年味。问题出辣啥地方呢？

记得我曾经辣媒体上发过一篇文章《年味被自己弄丢了》。说的是大家观念有了变化，看如今饭店的“年夜饭”每年国庆节后就开始预订了。再看时尚年货、有口碑的过年点心，像松糕、八宝饭、宁波汤团，还有老字号里冷盆、熟菜之类，天天侪辣排长队，就连阿拉小辰光家家户户侪会做的“蛋饺、蛋卷”，现在大家情愿到超市、饭店排队买半成品，也勿想自家动手做。记得当年我曾经笑话辣光明邨酒家排队买蛋饺的老同志：“蛋饺么自家屋里摊摊，犯勿着辣搿搭排队吃‘西北风’。”结果伊还来开导我：“阿弟啊，侬脑子想勿穿，现在啥人还去忙搿种事体？省省吧！”后来网购盛行，手机浪向点点，就可以等“蛋饺、蛋卷”送上门。可以坐享其成，自家就懒得动手，激情也就呒没了，曾经的“年味”其实是阿拉自家厾脱嗰。

听了我搿番分析，让阿三提起了精神：“对嗰呀，早前头过年休息日勿多，凭票证到处去排队买东西，回来还要加工半成品。当年屋里呒没冰箱，鸡鸭鱼肉买回来该腌的腌、该煮的煮、该风干的就找通风地方挂起来，起码要忙好几个礼拜。”

我讲：“往年我过年欢喜自家做糕团，松糕、八宝饭大家侪欢喜吃，今年身体原因呒没做。今朝正好元宵节，阿三侬假使呒没事体，现在就来帮忙做汤圆。”阿三听了，一口答应。

搿辰光，迎面过来老张，看见阿拉两家头兴冲冲一道走，就问：“做啥去？”听说阿拉打算为过元宵节“重操旧业”，笑嘻嘻讲：“搿几天嘴巴里呒没味道，正好做点吃吃嘛！熏鱼、走油肉欢喜口伐？我来做。”

老张是退休厨师，有一手做菜的好手艺，只是平时勿大愿意动手，听伊主动提起，阿三马上接口：“要吃、要吃，走油肉长远呒没吃了，还有熏鱼，味道覅太赞哦！”老张讲：“现在屋里人少，懒得开油锅，喜欢吃，我就多做点。”

老张搿能一讲，我受了启发，讲：“阿拉勿妨来个专业化协作，叫上老房子动迁过来的宁波阿姨多做点‘宁波汤团’；还有苏州阿婆的‘甜酒酿’，到辰光大家分分，一道闹猛闹猛。”阿拉三家头一拍即合。阿三讲，我再叫儿子也来帮忙，大家动起来，过节才扎劲。