我个皋兰路情结

文/冯济民

网浪读到晏秋秋写个《皋兰路，一曲孤独的探戈》，勾起了我对迭条勒著名个淮海中路南面，毗邻复兴公园，仅长278米小马路个一段难忘个回忆。

勒上海，晓得皋兰路个人勿会得老多，去过个人大概就更少了。而我对伊却是邪气熟悉，常常会想起伊。迭还要从66年前个1957年讲起。

1955年，我进入卢湾区第二中心小学读书。学堂勒南昌路（雁荡路口）。后因校舍太简陋，政府投资勒皋兰路（瑞金二路口）建造了新校舍。1957年5月，新校舍竣工，阿拉高高兴兴来到新校舍上学。

当时，我家屋里住勒南昌路（雁荡路口），每日个上学路线是从南昌路往西走到思南路左转，朝南走到皋兰路右转，再沿皋兰路往西走到瑞金二路口，学堂就到了。一开始低年级，只上半天学，迭能个路每天来回跑两趟。到高年级上一天学，每天中浪回去吃饭，一天来回要跑四趟。从1957年一直跑到1961年小学毕业，勒皋兰路浪来来回回整整跑了3年多，算算次数要上千了。

当年个皋兰路有两个地方勒我心里印象最深。一个是皋兰路16号，伊个洋葱头俄式教堂。据查，迭搭原为圣尼古拉斯教堂，由协隆洋行俄国建筑师亚·伊·亚龙设计，昌升营造厂承建，砖混结构，于1932到1934年建造。

另一个是皋兰路10号，上海江南造船厂职工疗养院。从门口看进去，一片绿草坪特别引人注目。据查，迭搭是原旧上海海关（江海关）副总税务司伍汉旧居，洋房是伍汉自家购地、设计、出资建造，于1941年建成。

整条皋兰路浪差勿多侪是住家，有勿少花园洋房搭小别墅。交关富人、名人勒此地居住。皋兰路一日到夜侪是安安静静个，难板有人走过，车子就更加少了。人甚至可以直接走勒马路浪。路浪也呒没一爿店。简直就是世外桃源。

勒皋兰路新校舍里，我读完了三年级到六年级，度过了欢乐而难忘个小学生活，以全5分个优秀成绩毕业。从此，我告别了二中心小学，也告别了皋兰路。

从1961年至今，一晃已经62年过去了。其间，我也曾偶尔走过皋兰路，每次侪会情勿自禁个回忆起自家当年背仔书包上学、放学个情景。

讲起来也奇怪，六十几年过去了，上海发生了天翻地覆个变化，皋兰路却仍旧安安静静，既呒没拆迁造高楼，也呒没破墙开店，还像当年一样，仍旧是个世外桃源。伊座教堂已经是上海市建筑保护单位，现在是思南书局。辣勒“一年一个样，三年大变样”个上海，尤其勒市中心地带，真算得上是凤毛麟角了。

愿皋兰路能一直是世外桃源，安安静静个。因为搿搭有我儿时个回忆。