阿姨爷叔慢慢走

文/侯宝良

一场秋雨，一阵凉。有天，我跟老婆辣银行办完事，别转头就走。听得身后传来一声声亲切关照：“阿姨爷叔慢慢走。”顿时立刻让阿拉心里感觉暖意浓浓。

秋雨潇潇，道路湿滑，拨老年人一个温馨个提醒交关重要。近腔头骨伤科个医生朋友也带信拨我，讲要当心跌跤，伊以第一手资料说话，迭个时段是老年人出事体个高发辰光。勿少老人家平常精神抖擞，结果掼一交就勿来三了，搿倒勿是危言耸听，类似个事体年年有。记得2013年上海疾病预防控制中心举办过一次“预防老年人跌跤”个征文，我就写过一首顺口溜，从多方面来讲防跌跤个要诀跟关切，还得过奖。再拨大家一道来分享：

夫妻本是比翼鸟，出门就该手搀牢，互相提醒多关照，覅去拥挤看热闹。

岁数大了要服老，腿脚勿便少跑跑，无奈外出路途遥，撑根拐杖作依靠。

清晨锻炼讲实效，动作适度覅硬套。碰到头晕加心跳，慢慢下蹲覅焦躁。

老友同行情趣高，思想集中路走好，相互搀扶有情调，碰到困难多照料。

等等站立再起跑，防止跌倒最重要。鞋子防滑摆首要，覅求时髦觅轻巧。

“秋风秋雨愁煞人”是形容多事之秋。七老八十也算到了人生之秋，好生善待啊。“昨日黄花昨日昏，今朝风雨岂无晴”，叫声“阿姨爷叔慢慢走”，搿闲话提醒得好。“岁数勿饶人要服老，腿脚勿便少跑跑”，少跑勿是覅跑，就是讲走路要当心。老年人走路应该挺胸抬头，但勿要昂首阔步，左顾右盼、谨慎行走才是必须个。轧道（结伴）同行时“相互搀扶有情调，碰到困难多照料。”有需要帮助个辰光，一定勿要逞强，坦然接受、留个微笑，开口感谢，让迭个世界多眼美好和谐个画面。

“阿姨爷叔慢慢走”也是一句双关语。人老了脚步放慢点，做事体覅急躁、覅焦虑，“只争朝夕”让拨年轻人。“慢慢站立再起跑，防止跌倒最重要。”走好！首先要有自知之明，审时度势立稳当，行稳致远更重要。同样讲做人，要保持晚节，勿要被利益诱惑，凡事三思，勿要冲动，更勿要自毁形象。老了就应该有老人个腔调。侬看心态好了，幸事尽找不老翁，人生百岁勿是梦。但愿秋天里个“阿姨爷叔慢慢走”！