黏滋疙瘩个秋葵

◆ 沈一珠

早浪7点钟左右，窗外已经日光曜曜，拉开窗帘，窗玻璃浪有点水迹，开窗，地浪有点潮几几，应该是落过雨了。一场秋雨一场凉，慢慢叫来好了。

舀一小调羹石斛粉到小碗里，烧水壶个水有点温热了，拿水一边慢慢淋到石斛粉里，一边用小调羹勿快勿慢顺一个方向调，一直到水粉完全交融成厚笃笃个浆；烧水壶个水开了，再慢慢倒进小碗里，还是顺一个方向勿快勿慢个调到浆慢慢变成稀薄透明个羹，冷一冷就好吃了。石斛粉只剩半罐了，经过迭能半罐个实践，终于掌握了拿石斛粉调成琼浆玉液个办法，除脱控制水温，就是控制心态，需要慢慢来，勿能急。

今朝早饭是绿豆杂粮粥，过粥小菜除脱腐乳，还有一碟秋葵拌金枪鱼。有种习惯一旦养成就斜气难改，譬如讲，早浪要吃得清淡点、软熟点、稀薄点，所以最欢喜酱菜、腐乳配泡饭、米粥。勿过，时代勿同了，日脚也好过了，除脱好吃还要讲究营养，蛋白质、维生素、补铁、补钙、补锌……

慢慢来，白煮蛋加点腐乳卤，老味道新吃法；准备点生菜、胡萝卜，生个勿习惯，烫烫熟；像秋葵迭种，毛茸茸，轻勿得、重勿得，烧好仔还黏滋疙瘩……勿习惯，要学习，还是辣辣日本小老头个《蔬菜教室》里先上课——秋葵个原产地辣辣非洲东北部，黏滋疙瘩是伊个特性，也是伊个秘密武器，是伊为了适应干燥酷热个环境努力进化出来个，好锁牢身体里个水分；而黏液个主要成分是果胶等膳食纤维，有增进食欲、消暑个作用。

慢慢来，会发觉，秋葵操作起来斜气便当。用盐搓一搓，可以去脱表皮绒毛，假使再腌一腌，可以更加入味；根蒂勿需要切脱，要包牢肚皮里水嫩嫩肥笃笃个籽；沿着蒂个周围削掉一圈硬皮就好，蒂也可以吃；用牙签戳几只洞，烫熟后秋葵不会变皱，放进热水焯1分钟左右，倒到冰水里激一激，沥干，横切成小段，用麻油、酱油、香醋、盐、糖一道拌一拌就好。我今早是加了点金枪鱼。

当然，清炒也一样好吃，前道工序相同，至于数量，根据人数安排，我用了10根；然后倒麻油进镬子加热，倒进秋葵，大火煸炒，再加点盐、糖、生抽、香醋，翻拌均匀就好。

慢慢来，习惯搿种东西跟秋葵差勿多，来来去去侪有点黏滋疙瘩。