学习班伺候

娄一晨

10月的最后一个周末，关心中国足坛的人都在关注一纸公告。许多人都在问同一个问题：恒大企业文化学习班是什么？许多人在寻找同一个人：卡纳瓦罗，你在哪里躲藏？本周二，我正好和两位老兄弟译男、李兵一起录一档谈话节目，卡纳瓦罗和恒大学习班的热点话题自然是重中之重。

李：娄啊，恒大学习班额事体侬有啥内幕消息吗？许老板迭记动作结棍来，卡纳瓦罗居然呒没昏过去还算心理素质蛮硬质呃。

译：是呀，卡纳瓦罗哪能呒啥声音哦啦？就简简单单带着老婆小囡乘飞机跑忒啦？

娄大笑：哈哈哈，我就晓得你们两个人要问我迭桩事体！但是，我能够晓得多少内幕啦？恒大上个礼拜六比赛额辰光我正好也勒嗨直播呀，就是上港主场踢大连。两面比赛差勿多一道结束呃，结果我跟刘越两介头刚刚回到化妆间，就听到阿拉下头小朋友一声惊叫——恒大最新公告，卡纳瓦罗第二天要参加企业文化学习班！当时辰光我跟刘越侪闷忒了！啊？迭额算啥路数啦？

李：嗯，凶！迭额就叫老板一言九鼎、一拍两散！

译：难道事先一点风声也呒没？我看交关文章里厢侪讲到恒大之前已经连续多少场表现糟糕，尤其是亚冠半决赛两回合拨日本人淘汰。

娄：是额呀，此前九场比赛，包括联赛、足协杯、亚冠，1胜4平4败。所以我当时就到微信朋友圈里厢去寻人，寻老早广东台个几个兄弟了解内幕。结果，伊拉几个赤佬回我讲侬等一歇，伊拉自家还呒没搞清爽啥情况来……

三人大笑。

译：现在来看许老板是真光火了，也是真伤心了。否则勿可能想出迭种方式来惩罚、来处理，而且还要用白纸黑字昭告天下。手条子真是辣啊……

李：讲了呒错。但是，手条子辣归辣，你们呒没觉着有点太难看了？平常侬俱乐部假使是处理国内教练，用侬恒大企业内部通告个方式大概呒没人会觉得有问题。但是，现在勿一样来，对面是卡纳瓦罗唉，对吗？人家凭啥要来接受侬恒大许老板个家法伺候？

娄：是呀，阿拉中国人从来侪讲究内外有别，外事无小事，所以恒大迭份公告拨我讲起来就是：恒大这回是真没把卡纳瓦罗当外人啊……

三人又笑。

译：我看到交关媒体勒嗨讨论恒大为啥勿索性捺卡纳瓦罗开忒算了，真个就是为了要省一点合同违约金？讲是5000万欧元，是吗？哪能可能啦？人家卡纳瓦罗又勿是戆大咯，自家提出辞职？迭个勿是更加拨外国人看笑话了嘛？

李：我觉着迭份企业文化学习班额公告哪，就是许老板当时急火攻心弄出来呃，对吗？主场比赛，上半场就0比2落后，老板心里厢多少挖塞？多少胸闷？真恨勿得当场就开忒伊啊！结果旁边人算拨老板听违约金，5000万欧元，乃么一记头拨硌牢。最后，想来想去只好用公告来发泄一下。至于是勿是拨人家看笑话已经考虑勿到了。

娄：老李可以额，分析了有道理。昨日有广东台个兄弟讲拨我听，一个号头之前，亚冠半决赛第一回合恒大客场输球，当时辰光许老板就已经想动手了！但是，现在情况就勿对来……