中超赛制 引发关注

娄一晨

本周，中国足协在上海召开2020年中超中甲中乙俱乐部总经理联席会议。有关今年中超联赛开战等重要议题自然受到广泛的关注，尤其是中超联赛的开战日期和可能采用的新赛制。

当天的新闻一出，立刻就有朋友给我来电。

友人：喂，娄兄啊，太好了太好了，中超联赛总算好开始了。我看到新闻里厢讲，6月底应该好正式开始了噢？

我：哈哈，应该是可以了。再拖下去，中国足协也吃勿消来……

友人：但是有一点我呒没看懂呀，就是新闻里讲中超联赛要采用啥新赛制？16支球队分成啥两个小组，先打小组循环，再打第二阶段淘汰赛。哎，迭个算啥路道啦？

我：哈哈，我就猜到侬要来问我迭个赛制问题。勿瞒侬老兄，上个礼拜陈主席亮相央视，蹲了白岩松额节目里就已经透露了有可能采用迭个新赛制。所以我前两天稍微研究了一下。

友人：愿闻高见！

我：迭只新赛制呢有眼像奥运会篮球比赛个赛制。侬看噢，第一阶段，16支中超球队分成A、B两组，分别进行小组循环赛，主客场对伐？总共是14轮，迭个就是常规赛，也有排名。接下来进入第二阶段，前头A、B两组个前四名共八支队再圈到一道成为争冠区，后四名八支球队形成保级区。争冠区、保级区全部采用淘汰制，1VS4，2VS3，5VS8，6VS7……总共是三轮淘汰赛，决出所有16支球队的最后排名。

友人：听起来有点复杂么？各么为啥足球要去向篮球学习赛制啦？往年30轮个联赛赛制勿是蛮好啊？

我：老兄啊，今年么特殊情况呀！侬想，联赛从2月份推迟到现在已经是5月份了，就算接下去能够从6月底开始，正常打完30轮联赛辰光够用伐啦？覅打到明年去啦？

友人：打到明年去足协是肯定勿肯啊。但是我看到网廊厢交关文章侪讲迭只新赛制漏洞弗得了。比如讲有可能出现第一阶段小组赛有球队14轮全输，但是进到淘汰赛第一轮只要主客场赢出就可以保级成功。还有人讲大概率会得发生冠军勿是成绩最佳额球队。侬讲讲看，成绩最佳额球队到最后拿勿着冠军？迭个赛制阿是肯定有问题伐啦？

我：老兄啊，常规赛冠军勿等于总冠军啊……侬看NBA介许多年数，季后赛额“黑八传奇”应该有印象伐？

友人：迭个勿一样个好伐？中超联赛到底是阿拉自家额比赛呀，赛制安排勿好勿是要拨人家骂煞忒啊？NBA么阿拉是看闹猛呀，当然是希望伊拉打了越冷门越好！

我：哈哈哈，好了好了，照侬老兄迭个想法，只有请侬出来为足协设计一套赛制方案了！