中超如何过年

娄一晨

2021年刚来，中国足协和中超联赛就迎来“坏”消息！

前天，我和几位朋友就在饭局中聊起了这个话题。

A君：阿娄啊，几家中超联赛额赞助商集体选择拖欠支付赞助费。迭个啥情况啦？难道要打官司？

B君：是额呀是额呀，我正好也想问侬呀。网廊厢新闻讲中超联赛16家官方赞助商当中，目前只有一家人家答应中超公司重新签赞助合同，并且已经付钞票了。其他人家非但呒没续约，而且连付款额意向也呒没。

我：哈哈，两位老兄看来还是蛮关心中国足球嗯嘛。

C君也加入进来：唉呀，老娄啊，侬懂呃呀，阿拉几额人么就是一道看闹猛呀……

我：唉，足协啦，有辰光想想也是蛮作孽额。好勿容易吃辛吃苦把去年联赛完成了，结果赞助商么还横勿满意竖勿满意……但是呢，闲话又要讲转来，现在迭个状况阿拉去年就已经预计到了。

A君：噢，对啊对啊，我记得侬去年就讲过啊，联赛缩水一定会得造成联赛总体价值跟牢一道缩水。

我：是呀。去年，整个中超联赛场次一记头减少了80场，从240场变成只有160场。场次少忒三分之一，各么侬联赛价值至少也要减少三分之一，对吗？但是，立了赞助商额立场廊厢，伊拉一定觉着远远勿止三分之一，一半也勿止。

B君：我看到有新闻讲，足协是做好准备减少三分之一呃，甚至于足协个心理底线就是减少一半。哪能？赞助商介凶狠？减少一半还勿满意？

C君：娄兄啊，去年是特殊情况呀，疫情影响应该要算“不可抗外力”，足协还是呒没办法呀。赞助商迭额道理总应该理解额咯？

我：理解是呒没错，但是人家赞助商也有道理呃呀。2020年大家侪难过，又勿是光侬中国足协一家，疫情影响对伊拉赞助商就勿是“不可抗外力”啦？讲了难听点，我赞助商现在已经拨“不可抗外力”逼得来弹尽粮绝，侬足协也来逼我，能逼出啥结果？大家同归于尽？

A君：哈哈，凶是侬凶，“同归于尽”也拨侬想出来了……

B君：老娄啦，讲法讲法就横下来了。各么侬讲，接下去足协哪能弄法？

我：哪能弄法？只有一条路——继续沟通、继续谈判，要么侬退一步，要么我退一步，寻只折中方案来解决。

C君：啊？介便当？哪能折中？

我：凭中国人个智慧，还是要折中……我觉着最后还是会得谈一个新额尺寸出来，比如讲赞助周期再拉长，赞助单价再拉低……还有得交关闹猛好看，至少好看到今年过年……