国泰民安 恒久远大

娄一晨

前天，约了几位老友喝下午茶。从年前一直延到年后，终于成局。

话题嘛，自然少不了时下热门的中超乱局。

A君：娄啊，额记闹猛来。北京国安要改名叫“国泰民安”，广州恒大要改名叫“恒久远大”，乃么中国足协迭只俱乐部名称中性化个改革要僵脱来……

B君、C君一起应和：是呀是呀，中国足协格记头晕了结棍来。

我：唉，头晕么也只好晕来。

C君点头称是：我就想晓得，足协格趟啥体啦？硬劲吃牢所有俱乐部改名字，白相人咯？

A君一向沉稳：我倒是觉着足协提出俱乐部名字中性化额方案有伊个道理。中国足球，尤其是中超联赛发展了介许多年数，只看见拼命烧钞票，是应该去脱一眼商业味道。

我：A兄讲了有道理。足协本身个想法呒没错，只是中性化名称个方案出台有点粗糙，具体细化勿足，拨大家捉牢扳头来。乃么尴尬来……

C君：格么侬娄兄个意思哪能弄法？

我：我是觉着中国足协应该出台明确具体额指导意见，讲清爽改名额规则。比方讲，只允许俱乐部从动物、花草、人物、历史典故、地名别称、地标性建筑等几方面领域去寻名字。侬足协先把条文写清爽，把规则空间定好，大家再想去寻漏洞、钻空子就呒没介便当了。

A君笑了：娄，侬额意思是足协最好推荐用名也编写一套出来，直接发到所有俱乐部去？

我：哈哈哈，当然可以！比如上海东方明珠队、江苏金陵队、广州羊城队、重庆朝天门队、武汉黄鹤楼队……阿是听起来就充满历史文化气息啦？

B君仍然意难平：我就是觉着啦，中国足协吃饱了呒没事体瞎弄！明明改革要改额事体交交关，去泡沫、打基础、抓青训、培育市场，随便数数侪比侬俱乐部改名字更加重要吗？

我：唉，迭个乃就只好讲是足协低估了俱乐部改名字迭桩事体个复杂程度。以为是所有改革项目当中有可能是最便当个，结果呒没想到北京国安额股权转让、债务承接事体介许多，绝对就是湿手搭面粉，掼也掼勿脱……

C君：还有天津泰达来，哪能弄法啦？

A君突然来了一句：天津？还记得《潜伏》里厢余则成讲过一句台词吗？——哎呀，天津这个地方，情况太复杂了……

众人大笑。