全运会足球你看了吗

娄一晨

大概是上周日吧，友人W来电，略带些怨气。

W：阿哥啊，我帮侬讲呀，搿两天勿是全运会足球比赛打了蛮闹猛呃嘛，昨日夜到我想看看上海队踢新疆队，1/4决赛。结果侬晓得伐啦？从央视体育到五星体育，再到侬咪咕体育，居然呒没一家人家转播！迭个算啥路道啦？

我：兄弟啊，实在勿好意思，全运会比赛我实在是呒没关心。但是，足球1/4决赛，哪能会得呒没一家人家转播哦啦？要么，就是根本连得转播信号也没得……

W疑惑：啊？啥叫连得转播信号也没得？

我赶紧解释：哦，是迭能呃……阿拉国内额规矩是：每一届全运会，电视转播信号制作侪是由央视牵头，各个省级电视台联合参与，出人出力出设备，分包各只项目各个赛场。迭个生活呢就叫公用信号制作，转播车开到现场，摄像机架好，图文字幕配好，信号传送出来提供拨所有人家。从央视到各家省级台，大家各取所需……

W：个么侬个意思就是昨日夜到上海队跟新疆队搿场比赛完全呒没转播信号咯？所以就变成功呒没一家人家好转播咯？

我：我只是按照老早额经验来帮侬分析，大概率是迭个状况。要么我再帮侬问一声五星体育个老兄弟？伊拉应该最了解实际情况……

W愤愤不平：啥么事！观众想看个比赛么看勿着，连得转播信号也呒没人制作！个么接下去上海队进了半决赛应该有转播信号了伐？

我诧异：兄弟，侬先等歇……侬哪能一记头介关心搿趟全运会足球比赛了啦？全运会足球侪是小朋友年龄段呀，U20、U18，水平一般来兮呃呀……

W：唉呀，我为点啥？主要是拨根宝感动了呀……人家老爷叔今年已经八十几岁来，还要再带队出征全运会！多少勿容易啦？侬还记得伐啦，2009年山东全运会决赛，勿就是根宝带了武磊、吕文君、张琳芃、王燊超、颜骏凌，还有曹赟定来，伊拉一帮崇明基地个小朋友掿冠军呃嘛？当时我就勒嗨现场呀，看到张琳芃一脚远射破门，还有吕文君头球进球……开心啊……

我突然一阵感动……

W继续在说：唉，快是真快，2009年全运会，一枪头已经16年过脱了！阿哥啊，要么侬帮侬五星体育个老兄弟们转达一下：全运会足球比赛还是有交关观众想看呃！尤其是阿拉搿种老观众！谢谢！