清蒸鳝筒

文并图/沈一珠

画好图，晚了，周老师邀请阿拉一道，到茶室旁边一家小馆子里吃夜饭。

理由简简单单：上趟伊去吃过中饭了，饭店小是小，不过，上海味道老足；反正回去总归也要吃夜饭，就一道好了，便饭呀。

心里晓得，其实是周老师客气，要请客吃饭。

心里向是一直欢喜迭种齐巧、正好、勿会过度热情、也勿大好让人回头个客气方式。

饭店勿大，是二楼，进门就是楼梯口，朝左下去一格，就是一楼；朝右拾级而上，转弯再上几格楼梯，就是二楼。

人勿多，安安静静，就辣窗台下一只小台子坐定，一人点一只小菜，三菜一汤，三碗白米饭，一顿夜饭吃得老满足。再看看，窗外头一方蓝天，慢慢交变深，大家出得门去，各自回家。

搿就是日常，平平淡淡，又总让人心满意足。

总觉着，有种小菜适合到饭店里吃，比方搿天夜里个鳝筒煲，浓油赤酱里向，咸甜正好，炸透，软软糯糯个是蒜头；焐透，粉搭搭个是栗子，是交关上海人个心头好。

只不过，回到屋里，阿拉还是清淡点。

清蒸鳝筒个材料：黄鳝1斤，咸肉和去皮白果各若干。调料：盐、糖、料酒、老姜、蒜头和香葱各少许。

做法：黄鳝活杀后，用开水烫一烫，去外表黏液后，切成寸段，控干水分，备用；咸肉切薄片，蒸熟备用；取盘子，黄鳝围一圈铺好，姜片和拍碎个蒜头摆辣黄鳝圈内，咸肉、白果铺辣黄鳝上头；撒点盐、糖，倒点料酒，摆进蒸锅蒸20分钟左右即可；出锅后，撒上葱花，浇热油，就好吃了。