好吃个“大闸蟹”

文/许德华

蟹是江浙沪菜里向花头最浓、腔势最足个“大亨”。

“蟹”个名字一开始就蛮弹硬，据说老早有螃蟹辣水田横冲直撞，种田个老百姓想了交关办法侪呒没能够克制伊个刁钻促掐，只好叫伊“夹人虫”。有一个叫巴解个人拿蟹赶到一筑堆，用开水浇烫，“夹人虫”被烫得壳子发红，一股香味传了开来，伊尝了一口，发现味道邪气好！“夹人虫”从此成了一道好菜。后来就辣“解”字下面加个“虫”字，拿“夹人虫”称为“蟹”。鲁迅先生讲第一个吃螃蟹个人是勇敢嗰。

至于“大闸蟹”搿种称呼个由来也有好几种讲法。一种讲法是苏州卖蟹人叫出名嗰。当时伊拉常常下半日挑担沿街叫卖，吆喝个闲话就是：闸蟹来大闸蟹。其中个“闸”，音同“煠”，即隔水蒸煮。另外一种讲法是捉蟹个人往往会辣港湾间设闸（闸以竹编成），夜来隔闸，置一灯火，蟹见火光，即爬上竹闸被一一活捉。块头大个蟹就被称为大闸蟹。搿种讲法倒是同上海个简称“沪”个来历差不多（沪，沪簖，一种竹编的捕鱼工具）。

小辰光看见市面浪卖个大闸蟹侪是用草绳扎成一串串，装辣竹编个蟹篓里向。卖蟹个人计算价钿既可以称分量按斤买，也可以数只头论只买。邻居阿姨贾丽卿欢喜吃蟹，假使看到伊下班回来手里拎仔一串大闸蟹，我就是晓得有口福了。贾阿姨待我邪气好，我第一次尝清蒸大闸蟹就是贾阿姨请客嗰。等到贾阿姨配好佐料：生姜末砂糖油酱，阿拉一边吃一边茄山河。蟹个外号“横行将军”“无肠公子”咾啥就是从伊搿搭听来嗰。

读大学期间，周六中浪，学生食堂有辰光会有煠过个大闸蟹卖，1.50元一只，价钿勿便宜，但我还是会买几只带回屋里，叫来贾阿姨一道“喳”个开心。

有一腔大闸蟹成了“天价蟹”，蟹吃得少了，但是报刊杂志浪写蟹个文章倒是多了起来，乃末懂了“大闸蟹”个来历，还有古代文人写个大闸蟹诗词。譬如“形模虽入妇人笑，风味可解壮士颜”就描写了大闸蟹个卖相，看看是有点好笑嗰。“一手正宜深把酒，二螯已是饱经霜”写出橘黄蟹肥辰光吃蟹人个开心。据说有吃蟹个老吃客还可以拿蟹壳拼成完整个蟹形，看了觉得邪气稀奇。

苏东坡一生波折但伊活得通透：不到庐山辜负目，不食螃蟹辜负腹。伊情愿“一诗换得两尖团（螃蟹，古称尖团）”大闸蟹味道好，顶脱啦！“秋风起，蟹脚痒”夏去秋来一年中最好吃个大闸蟹又来了，走，扳老酒吃大闸蟹去！