逢年过节搭牌楼

文/袁荣良

讲到牌楼，就会想到牌坊，搿两种侪是中国传统建筑形式。葛末伊拉个区别辣啥地方呢？有种讲法是有楼顶斗拱个牌坊叫牌楼，还有一种讲法是牌楼个结构像“楼”，牌坊个结构像“门”。到底啥人正确，我也讲勿清爽，记忆里同伊拉有关系个是老早仔逢年过节搭牌楼个事体。

埃歇辰光，上海市区里大大小小个工厂邪气多，其中规模比较大个一般侪是国营工厂，街道工厂规模小但是数量多，因为场地有限，侪是轧辣大马路小弄堂里，螺蛳壳里做道场。当时逢年过节勿像现在有介许多娱乐项目，总结起来只有几种方式：贴标语，插红旗，敲锣打鼓，唱歌跳舞，以及辣厂门口搭喜庆牌楼。

埃歇辰光一年有七天国定假日：元旦一天、劳动节一天、国庆节两天、春节三天。到了春节，工厂是必定要搭牌楼庆祝嗰。一般提前两三个礼拜厂里就开始准备忙起来了，八仙过海，各显神通。

牌楼大小主要根据厂门大小来定，但具体个搭建样式就各有各个讲究，按材料分有四种：竹木结构、纯木结构、钢木结构、金属结构。搭建样式一般是厂门两边各一根立柱，方嗰、圆嗰、半圆嗰侪有，立柱之间架一根横梁，搿就是所谓“两柱一间式”。假使是厂门足够宽阔，就可以立4根立柱，架3根横梁，当中个横梁较长，两边个横梁较短，搿就是所谓“四柱三间式”。再考究点，也有辣横梁浪向装斗拱屋顶嗰。

立柱浪会贴大红对联，周边松枝、柏枝、纸花、绢花点缀。横梁浪一般直截了当写“欢度元旦”“庆祝五一”“庆祝国庆”“欢度春节”等主题，横梁下头挂大红灯笼或八角宫灯，横梁上头插国旗彩旗。埃歇辰光呒没LED灯，大多牌楼侪会装白炽灯或者彩色灯泡布置景观照明，假使某家工厂个彩灯能够分组闪烁或者“跑”起来，就特别有面子了。

对阿拉搿点小朋友来讲，逢年过节除脱可以辣屋里吃到好吃个物事，结伴去工厂门口看灯也是一桩邪气开心个事体，有辰光阿拉还会对勿同工厂搭建个牌楼打分，一般打三分，好看打四分，假使辣横梁浪装几只小马达驱动个木偶，绝对打五分，太简单难看嗰，不及格！有一年，有小朋友发现交关牌楼浪“欢度”写成“欢渡”，顿时好像发现了重大问题。大家互相讨论，还有人写信拨报社。再后来，果然侪改过来了。

鳞次栉比、多姿多彩个牌楼烘热了过节个喜庆气氛，成了阿拉小辰光最欢乐个一道风景线。