绒线编出七彩人生

文/吴 毓

我六七岁辰光，看到姆妈一有空就拿起绒线针编织绒线衫，鹅黄颜色嗰，老好看了。织好了，姆妈穿辣身浪向，像女神一样登样漂亮，高贵雅致，我心里邪气羡慕。勿过，我埃歇辰光只是一个小萝卜头，轮不到我来穿介好看个绒线衫。我心里暗暗思忖：长大了也要自家动手织一件好看个绒线衫穿穿。

姆妈好像天生就有一双巧手，织出来个绒线衫平整服帖，花式花样，好看出挑，别出心裁，周围呒没人比得过伊。等我真个像模像样织出一件完整个绒线衫还是辣我十八岁中学毕业个辰光，姆妈托人买到一斤全羊毛粗绒线，老好看个铁锈红。埃歇辰光市面浪个绒线大多数侪是化纤嗰，全羊毛绒线邪气稀罕。辣姆妈个指导下，我选了差勿多粗细个绒线竹针，选了简单个平针织法，一有空，就拿起竹针埋头编织，碰到开腋窝、开领口，我就请教姆妈。紧赶慢赶，一个月多，我个处女作完成了，穿辣身浪向，勿大勿小，正正好好，邪气服帖，心里向开心得勿得了。

后来我听了阿爸个建议，去读工业局技校，入学个辰光，交关同学一道去莘庄照相馆拍照，我就穿了搿件亲手织个羊毛衫。埃歇辰光还呒没照相机用个彩色胶片，只能拍黑白照片，但照片浪个我笑得老开心老好看嗰，我又请照相馆师傅帮我辣照片浪涂上颜色，于是我拥有了人生中第一张彩色照片。

后来我考进大学，辣大学里认得了现在个老公。伊辣木器厂里工作过，有一手木工手艺，做了一只床边柜送拨我。我想回送一样礼物，想来想去，就买了两斤黑颜色个“开司米”（一种化纤绒线），为伊织了一件毛衣。黑色开司米毛衫织好了，穿了伊身浪向，邪气灵光，看伊饱满个精神头，我觉得之前个挑灯夜战、费心费力侪是值得嗰。再后来，阿拉两家头结婚了，双职工，又生了儿子，屋里呒没老人帮衬，邪气忙，我就等儿子睏觉个辰光，为伊织了一套老漂亮个墨绿色绒线衣裤。记得当年夏天邪气热，连老几天气温超过36℃，工厂放假了，厂里办个托儿所也放假了，儿子中浪睏中觉，我就坐辣伊床边织绒线，一针一线里向侪是一颗慈母心。

算起来我已经有廿几年呒没再碰过绒线了，记得最后织绒线衫是帮小叔子个女儿织嗰，本来想为伊织一套粉色个毛衣裤，但因为我个颈椎和腰椎勿来三，最后我只织了一条绒线裤，绒线衫是姆妈织嗰。我和姆妈一道完成了搿套粉色绒线衣裤送拨小叔子个小囡，曲曲绕绕个绒线编织出浓浓个亲情。

退休以后，好几次想重新拿起竹针，织一根围巾、一顶帽子，但拿起来又放下去，头颈和腰椎实在吃勿消了，只留下一箱绒线和抽屉角落里个一把绒线针，好像辣述说曾经个编织生涯。