上海个旧货担

文/周允中

“易货易卖烂东西。”“洋瓶碎玻璃调自来火！”“啊有啥废铜烂铁卖口伐。啊有啥旧货卖口伐。”小辰光，弄堂里只要响起搿排收废品、收旧货个叫卖声，我就会马上回到屋里，从床底下拉出一只肥皂箱，里面装个侪是牙膏壳子、肉骨头、废报纸，再冲出去寻旧货贩子换几角几分洋钿，热天买棒冰，冷天吃零食，侪靠搿点零用钿。

当年收废品、收旧货个人，通常侪是挑仔担子，步行穿街走巷，一路吆喝，上门收货嗰。

旧货贩子最喜欢去嗰是打算搬场个人家，因为搿种人家通常会有交关勿想带走个旧货需要处理脱，所以有机会用收废品个低价收到勿少半新勿旧个物事，整理一下再卖出去可以赚勿少铜钿。可惜搬场勿是每天侪有嗰，能勿能碰着要看额角头高勿高。

对旧货贩子来讲，比较稳定个进货渠道是住辣高档地方个大户人家，因为搿排人家平常总归会有一眼旧款时装、废旧电器要丢脱，只要跟大户人家个佣人讲好，就可以低价买进。然后回到自家屋里向，经过一番整理，再到斜桥、虬江路、曹家渡、浦东杨家渡去出货。特别是闸北海昌路一带，只要缴三十文地皮税，就可以租一块地方摆摊头。下半天一点钟开始，搿搭地方就会人头簇拥，邪气闹猛，至于货品，衣裳鞋帽、五金工具、书籍期刊、古钱旧币、古董摆件，样样侪有。

当然，运道好个辰光，收旧货也会收到宝。有一家扬州盐商，家道中落，只好变卖家产过日脚。一天，发现三层阁楼上，有交关装茶油个竹筒，打开一看，里向个茶油老早侪干脱了，正好有收旧货个寻到门浪，就讨价还价用每只竹筒十块法币个价钿卖脱了。一共99只竹筒，收了990块。过脱几天，辣房间里又发现一只，拿斧头劈开，预备当柴爿烧，结果竹筒里跌出一根金条……

再后来，国家专门建立了废品回收公司，收旧货个摊贩侪成了大集体职工，废品回收和旧货交易也进入到一个新时代。