一家头 一杯茶

文并图/沈一珠

好朋友然舍人是做茶叶店嗰，十几年了，算有长性嗰。

做生意迭桩事体，一般侪是急功近利嗰多。比方讲，姆妈屋里门口有一家超市，从前叫“家得利”，名字蛮好听，里向个道理也是顺理成章——顾客家家得利，伊拉再得利；态度婉转，客客气气。一直做下去，或许可以做成百年老店？可惜，前一抢“家得利”改成“一心玛特”了。

老话讲“相由心生”，现在或许店名也是心声。

好朋友然舍人耐心好，一爿茶店定定心心开辣海。新冠疫情牵丝扳藤一年多了，勿大去了，心里还是常常牵记。问伊：生意哪能？伊倒也勿急，讲：总归是迭眼吃茶个朋友，介许多年数了，基本浪一个也不会落脱嗰。

一杯茶，定定心心泡。

勿晓得从啥辰光开始，每个礼拜六夜里，伊坐定辣店里，一个人，一杯茶，视频直播。看伊身姿婉约，手法婀娜，隔仔屏幕，也能觉着茶香清冽，袅袅而来，让人勿知勿觉放下所有事体，不喧不闹，心无杂念。

春节过去了，春天已经走到眼门前，不慌不忙，就学一学然舍人，一家头，一杯茶；若有雨，便听雨；若无雨，且听茶；避一避噪杂，摒一摒虚荣，心静天地宽。