小辰光养蚕宝宝

文/邵天骏

小辰光最欢喜做个事体之一就是养蚕宝宝，从小一直养到大，现在想来依然是邪气心动。

每当孵化季节，我弄来布满蚕卵个蚕纸，轻手轻脚放进棉花团，装到盒子里，静静等待蚕宝宝出现。

随着适宜温度悄悄到来，一条条孵化出来个蚕宝宝静悄悄冒出头来。初看真是一点勿起眼，细细小小，颜色是灰黑色嗰，形状有点像蚂蚁，无论从啥个方面看，侪勿像大家印象里个蚕宝宝。

鲜嫩个桑叶，良好个环境，适宜个温度，只是过了几天，蚕宝宝个样子就完全改变了，成了人见人爱个灰白色。搿种灰白色为蚕宝宝加了交关形象分。

记得埃歇辰光桑叶采摘并勿邪气费力，家门口勿远就有一大片桑树林，勿仅青翠欲滴个桑叶多得一天世界，而且树浪向还结了勿少桑葚，小朋友们吃起来感觉甜甜嗰，随时随地可以去尝。所以，我每次侪是采摘最好个桑叶喂蚕宝宝。到了夜深人静，我困辣床浪，听到蚕宝宝“沙沙沙”有节奏吃嫩绿桑叶个声音，就会知勿觉进入快乐梦乡。

眼睛一眨，几个礼拜过去，经过四次脱皮，背脊亮晶晶个蚕宝宝勿再吃桑叶，开始躲起来吐丝。看到蚕宝宝一门心思吐丝结茧，我既有点怜爱又交关敬佩，但更多个是好奇。直到一只只椭圆形个蚕茧出现，我还是难以相信伊是蚕宝宝个杰作。

破茧而出个蚕蛾留下来了交关希望个种子，新个生命轮回又将开始，一代又一代，代代无止境……