鹌鹑蛋酿香菇

文并图/沈一珠

上半天11点钟，接着姆妈打来的电话，讲，明明是要帮老姐妹打电话，结果老眼昏花，一勿当心，一只微信电话拨到纽约外孙女手机上，等一歇，对过拒绝了；再等一歇，对过发来一句闲话：外婆，我现在辣上班。哦哟，拨错电话了，做错事体了，姆妈懊恼煞，电话里长长短短说明了一通，叫我有空帮小姑娘解释一记。

豪燥跟姆妈讲，呒没啥关系。小姑娘最近是辣导演JOE MANTELLO的一只戏里做助理导演，五月底，搿只戏就要辣百老汇上演，搿歇辰光，齐巧是伊拉夜里工作辰光，蛮忙。叫姆妈勿要怪小姑娘挂电话就好。

想想，小姑娘从前跟外婆老要好，隔代亲呀，外婆老早忘记对自家女儿有过的五斤吼六斤腔调了，看到下一代小小人，完全放弃原则，样样事体候牢伊。记得小姑娘还只有四五岁辰光，有一趟，因为受仔点委屈，一只电话打到外婆屋里告状。结果，外婆放下电话，一歇歇工夫，拍马赶到。

一晃，又是交关年过去。外婆、姆妈和女儿，从原先的你中有我我中有你，到现在远隔千山万水各管各瞎忙，互相牵记，偏生又多了一眼小心翼翼。

余生老贵，无论是做外婆做姆妈还是做女儿的，只要有辰光，侪要多见面多问好多打电话。

挂脱电话，突然有兴致，翻出菜谱，定定心心准备迭只鹌鹑蛋酿香菇。数出10只鹌鹑蛋排好辣台子上，切火腿粒少许；香菇10只，用温水浸泡到软，去脱根蒂，用油、盐、胡椒粉腌10分钟左右；底朝上，像一只只“香菇碗”，排好辣盆里，摆辣烧热的蒸锅里，隔水蒸10分钟左右；取出菜盆，敲开鹌鹑蛋，一只一只摆辣“香菇碗”里，再一一撒火腿丁若干，重新入蒸锅蒸3分钟左右，出锅。假使手头有菜心几根，焯熟，摆盆里配点颜色拗只造型；没有就算了，也勿影响口感。

鹌鹑蛋小，蛋壳又薄，敲起来蛮麻烦，勿过伊营养好。香菇富含“香菇多糖”，能提高人体免疫力。从前小人辣身边，常常烧迭种好看又好吃的菜，哄小人多吃点。现在小人勿辣身边，也勿怕麻烦，烧点好看好吃的菜，哄自家开心点。