嫩柳芽与红菜苋

文并图/沈一珠

今朝好天气，晴空，暖阳。看看交呀，眼门前迭个冷天蛮精彩，有过春天个温度，也有过冷天个飘雪。即如此，听老祖宗个闲话，跟牢节气时令，索价拿自家再多囥一囥，静等春又暖花再开，日脚么，该哪能过就哪能过。

大寒节气已过，按理天气应该冷，不过，迭个辰光，母鸡开始孵小鸡了，树林里鸟叫声也密了，喏喏喏，朋友送来个雪柳，也慢慢交生发。早上起来，喷好水，远看看，阳光当中个新芽闪闪亮，碎碎银，碎碎金，看得满心欢喜。近看看，娇滴滴，细巧巧，一芽两叶，想想，要吃起来，可能也是美味。

比方柳芽，就是可以吃嗰。明代一本书《五杂俎·物部三》有记载：“北方柳芽初茁者，采之入汤，云其味胜茶。”意思是，柳芽摘下来，炒干，味道勿比茶推板；清代有本《帝京岁时纪胜》，勒“三月时品”一章里也记，“嫩柳叶拌豆腐，乃寒食之佳品”。中医认为柳芽有苦味，清热解毒、祛火利尿，可辅助治疗上呼吸道感染……

大寒之后就是立春了，其实，迭些辰光个菜市里，当令好小菜应该是带着点春意个菜苋。勿晓得阿是古音字，反正，苋迭个字，阿拉上海人勿读XIAN，读苋（JIAN）嗰；从前勒学堂里读古汉语辰光，也听老师讲过，阿拉上海闲话里还保留交关古音字，所以，方言迭个物事，是一定要好好保护嗰。还有一个有意思嗰，红菜苋算是名副其实嗰，而白菜苋明明是绿嗰，阿拉偏生叫伊白菜苋。搿是为啥？请教有识之士。

除了菜苋，还有一样好吃物事就是冬笋了，伊勿但是一种高蛋白低淀粉个美味食材，还有滋阴个作用，用伊炒鱼、肉或者烧汤，侪好。啥叫药食同源？就是好吃个东西侪补。

顺手用刚入手个酱肉炒一碗红菜苋。食材：红菜苋半斤汏清爽，切段，沥干，酱肉一小块蒸八分熟切片，盐、糖、料酒各少许。热锅冷油，拿酱肉片翻炒出香味道，加红菜苋炒到变颜色，加少许料酒、盐、糖调味就好盛出来了。