沪语如何繁花开

微信扫码看视频 听钱程沪语朗读

文/秦来来

电视剧《繁花》沪语版热播，引起一股沪语热。上海两会期间，就有政协委员表示：现在上海年轻人已经难以讲出一口正宗上海闲话了，究其原因，主要是“讲上海话个场景越来越少了”，因此建议勒勒学堂里每周安排一堂沪语课，或者组织沪语活动，让上海小囡有一个听、说上海闲话个环境。

其实啊，上个世纪五六十年代，宁波闲话、苏州闲话、苏北闲话、绍兴闲话……侪勒勒上海有一定市场，但是上海闲话是各种方言里个主打产品，绝对属于畅销货。当时上海广播电台里有一档沪语节目，叫“阿富根谈生产”，虽然节目里讲嗰侪是播种、施肥之类个话题，但是搿档节目勒勒市区也有交关听众，勿少人侪想通过迭个一档节目学讲正宗上海闲话。

后来中小学要求小朋友讲普通闲话了，为了帮助小囡掌握普通闲话，连带接送小朋友个老阿奶也开始练“沪普”了，上海闲话勒勒生活当中变得稀缺起来。再后来，从天南海北来到上海个新上海人越来越多，普通闲话就成了工作、生活当中，互相沟通个主要方式。搿能一来，生活里个上海闲话勿但“稀缺”，简直“紧俏”了。所以现在只要电影、电视剧推出“沪语版”，就会让不少老上海兴奋一段辰光。

1月12日《新民晚报》刊登文章《沪语何时繁花开》，提出学上海闲话要“从小朋友抓起”，我斜气赞成。但是，哪能拿上海闲话讲得更加标准呢？我认为有以下三点：

一、字音要读准。电视剧《繁花》里宝总介绍“爷叔”个辰光，用个是“沪普”，听上去有点煞风景。

宝总讲：“生意么就是，一买一卖”，宝总特意拿后面个“卖”读成“嘛”。其实沪语里向“买”“卖”读音是一样嗰，可以用“买进”搭仔“卖出”来区分。

二、事体要讲清。爷叔讲：“老辰光是我个长包房。”“老辰光”可以改成“老底子”或者“老早子”，因为“老底子”“老早子”侪是指“过去”“以前”，符合爷叔回忆过去个语境。而“老辰光”一般指对话双方侪晓得个具体辰光，比如约某人“老辰光、老地方”碰头。

三、“尖团音”要分明。搿一点反对个人可能会多一眼，甚至包括部分专业人士。沪语虽然呒没国家标准，但是有长期流传下来个讲法、字音读法，包括尖团音。其中代表就是上个世纪五六十年代，上海广播电台个沪语广播，搭仔老一辈沪剧艺术家勒勒沪剧节目里个说白、演唱。记得从前沪剧团、滑稽剧团招生，侪是先要培训上海闲话嗰，学员必须能讲一口标准上海闲话，然后才能登台表演。

当然，分清尖团音个要求主要是针对专业演员，对一般老百姓来讲呒没必要苛求。

对大众传播来讲，电影电视剧个影响是斜气大嗰，打出“沪语版”旗号个影视剧，最好能真正做出样子，尽量拿出让老上海人认可个“沪语版”。实际浪，要做到迭个一点并勿难，现在还有勿少老一辈个沪剧演员搭仔沪语播音员，只要勒勒演员对台词搭仔最后配音个辰光请伊拉来纠正一下，还是可以解决嗰。