小辰光个阅读时光

微信扫码看视频听钱程沪语朗读

◆赵妃蓉

关于看书最早个记忆，是小辰光摆辣弄堂口个小人书摊头。一本本小开面个连环画，对阿拉小人特别有吸引力。就是从搿点小人书里，我晓得了清廉刚正个包公、精忠报国个岳飞、勇猛善战个杨门女将，还有齐天大圣孙悟空、翻江倒海个小哪吒……

小辰光阅读个开头是纸质小人书，所以到今朝我还是习惯纸质阅读。就像有研究讲，要是小辰光欢喜吃啥物事，长大勿管走到啥地方，勿管还跟勿跟爷娘一道过，味觉记忆总归牢牢留着。阅读体验也一样——埃歇辰光电视机还是稀奇物事，跟现在习惯用手指头划屏幕个小朋友比，翻纸头看小人书对阿拉来讲是肌肉记忆。跟仔情节发展，右手捻纸头个速度越来越快，急起来还会拿手指头伸到嘴巴里沾点唾沫帮着捻页。爷娘看到要骂勿讲卫生，不过后来学到“津津有味”，我头一个想到个就是钻辣小人书里个感觉。

看《新民晚报》个“娃娃天地”搭仔“猜灯谜”，是我从看小人书转到看报纸、杂志个转折点。字勿多，但搿两个小栏目能拨小朋友交关多想象空间，“猜灯谜”还有点悬念，看起来老扎劲个。

记得小辰光顶有名个儿童杂志是《小朋友》《好儿童》《少年文艺》。《小朋友》里个故事侪短小精悍、通俗易懂，“小兔儿乖乖，把门儿开开”搿种童话，我头一趟就是辣《小朋友》里看到个。每期《好儿童》封底故事个主角是小兔菲菲，搿只大耳朵兔子做了交关多好事体。我也属兔，所以长大起了笔名“小兔菲菲”，一看到就像回到小辰光。《少年文艺》个文章文学性更强，适合高年级学生。我呒没向搿本杂志投过稿，但少女时代有幸被伊个记者采访过——作为连续三年个区三好学生，跟读者小朋友聊班级治理个经验：哪能帮老师因材施教？哪能搞课余活动？哪能用黑板报搞全班竞赛？

以前我是纸质阅读个死忠，觉得只有读纸质书才是真阅读。不过最近也试了新办法：拿要看个书分分类，有些勿用精读个，辣iPad浪看看就可以了。看电子书还有一个好处——能看到其他读者个批注，有些问题作者还会直接回复，搿种互动拉近了读者与作者个距离，看别人个批注也能引发自家个新想法。

勿管是纸质书还是电子书，从小养成个阅读习惯能陪我一辈子。作家毛姆讲“阅读是一座随身携带个避难所”，真是老精辟个。人生路上难免有曲折，但只要有好书相伴，总归有希望。