苹果生梨暖身汤

◆ 沈一珠

天冷了。窗外，冬雨绵绵、若有若无。窗内，准备一碗清清淡淡个热身汤。冬天了呀，跟秋雨个欲冷还寒、半推半就个态度比起来，冬雨不动声色个寒意，多少让人觉着后背心有点点冷。

所以，准备一只丑苹果，一只秋月梨，一只红萝卜，一粒大红枣，一片老生姜。拿切成丁个苹果、生梨、萝卜，跟红枣、生姜，以及一大碗火热踏踏滚个开水一道倒入慢炖锅，调到甜品模式，一个半钟头后就可以吃了。

苹果比较温和，每天吃一只，对肠胃好之外，有增强体质个作用；生梨虽然寒冷，但可以生津、化痰；萝卜么，通气、消食顶好了；天冷了，生吃水果固然酸爽，但烧热了吃，再加点生姜、红枣一道，侪是为了应对迭个悄悄进“城”个寒气。

前一阵，到海燕画室去画画。海燕特地去花市买了新娘花，一大捧灰粉红个鲜花。对着一团辣日光里闪亮个灰粉红，搿种跃跃欲试又无从下手个情绪，有点像新娘子面对未来忐忑不定个心情——过日脚么，光有一颗粉红个公主心哪能够呢？不过，灰个，紫个，红个，蓝个……只要比例得当，总归是好看个。

眼门前，对着同一捧花，偏冷、稍暖个两幅作品已经收尾，果然是，冷暖感受总是因人而异。而与此同时，海燕个先生急匆匆走进画室，忙忙碌碌指挥物业工人调试画室里个空调，一顿手忙脚乱，终于，热空调模式，开始正常运行，而画室里那只窜来窜去个泰国小猫也终于停止了“喵喵”乱叫。

回转去个车上，听到海燕搭伊先生个对话：“迭只猫就是欢喜叫，吵得来。”“搿是因为泰国热带猫，怕冷。”“是迭个原因呀？”“侬呒没看见吗，刚刚伊孵辣空调出风口，勿响了。”“明朝帮伊买件衣裳着着。”

哦哟喂，原来，如此。