记忆里个白马肉

◆ 史美龙

提起白马肉，当今个小字辈听到名字，以为是白马身浪向个肉。其实，伊跟肉类勿搭界，讲得明白一点，就是家喻户晓个豆腐。葛末，两千多年前发明个豆腐为啥还有白马肉个叫法？老早子听大人讲，迭个跟早期辣了宝山、嘉定、崇明等地方做豆腐个昆山人有关。

老底子做生意，每个行当侪有鲜明个地方特色。豆腐是昆山特产，有交关昆山小老板到上海郊区小镇开豆腐店。为了赚铜钿，伊拉撇开平平无奇个豆腐叫法，打出昆山流行个白马肉叫法，一下子吸引了人气。豆腐店老板挑仔担子走街穿巷大声吆喝：“白马肉来啦，白马肉要口伐。”

离开小镇远一点个村庄，大家听到外面叫卖“白马肉”，觉得稀奇，侪出来看看啥个名堂。一些当家人看到真东西是豆腐，晓得是摆噱头，但发现搿点豆腐价廉物美，烧只汤，或者拌点小葱，味道交关好，也就摸出铜钿捧场。天长日久，当地人也就拿豆腐叫作白马肉了。葛末昆山人为啥要拿豆腐叫成白马肉呢？据说迭个跟当时老百姓个经济状况有关。埃歇辰光，有铜钿人家吃鱼吃肉。呒啥家底个老百姓想吃肉，只有眼福，呒没口福。大家看豆腐又白又嫩，就拨豆腐一个斜气风趣个名字——白马肉。虽然勿是真正个肉，但挂了一个肉字，穷人家买得起，讲起来也算有肉可吃。

到了现代，白马肉个讲法已经勿大听到了。但是白马肉个烧法，一代又一代传承创新。辣了上海郊区，有人家喜欢种点雪里蕻，用腌制个雪里蕻咸菜烧白马肉。还有个用雪里蕻咸菜炖白马肉鱼头汤。考究一点个，放点香菇、蘑菇、菠菜，煲一锅白马肉老鸭汤。寻常人家烧出来个家常菜，清爽又营养，一家门吃得欢声笑语，碗底朝天。