干贝萝卜排骨汤

◆ 沈一珠

从听到上海落第一场雪，就打开电脑开始写，后来就一直有事体穿插进来——买个小菜到了，排骨、萝卜、干贝咾啥；前两天下单个快递来了，蛮好看个包包，跟想象个一式一样；楼下邻居上门来打招呼了，昨日伊拉屋里两家头出门了，偏偏忘记关煤气，结果辰光一长，灶披间冒烟了，焦毛气铺天盖地；阿拉急出乌拉叫来物业，物业心急慌忙寻把扶梯一楼搭到两楼，破窗而入，之后消防车也到了，还好呒没出大事体。

就迭能滴滴笃笃事体一桩接一桩，当中还要烧饭、烧菜、吃饭，一直忙到维也纳新年音乐会开始。今年维也纳也有新意，外交官圆舞曲，演员服装居然是西装加长裤，穿个还是芭蕾舞鞋……

元旦就迭能过去了，平平常常，忙忙碌碌。

2026年第一天早浪学了一句英语，有人辣咖啡馆点咖啡，服务员介绍，Our house blend is great！迭个blend是“混合物”个意思，咖啡店里个混合物，当然就是咖啡了，所以，服务员是讲，“阿拉店里个招牌咖啡蛮灵个。”

突发其想，迭句闲话摆辣阿拉灶披间里讲，应该就是：阿拉屋里个私房菜蛮灵个。

好吧，接下来就写点阿拉“灶披间里个混合物”吧。

《浮生六记》里有个段子：“夏月荷花初开时，晚含而晓放。芸用小纱囊撮茶叶少许，置花心。明早取出，烹天泉水泡之，香韵尤绝。”

鲜花窨茶迭种现在看起来特别有情调个事体，当时也就是生活还蛮窘迫个芸娘个一个日常，纱布袋袋装一笃笃茶叶，摆了花心里，一夜吃足香味道后拿出来，用拷来个泉水烧开，泡壶茶，从香气到吃茶，一派自然。

想想也是迭能，美好与优雅，只要侬想，就可以有。因为迭个东西应该来自人内在个稳定秩序，拿伊做出来就好。

烧饭烧菜也是迭能，家常个往往就是又好看又好吃个。眼门前是水萝卜一根，干贝若干，肋排350克左右。水萝卜汏清爽，切大片；肋排用葱姜水焯一焯去腥味；干贝泡半个钟头左右，连水跟萝卜肋排一道摆镬子里，加足水，大火烧开，撇脱浮沫，温火慢炖1个半钟头；临上桌前，摆一点点盐调味就好。至于干贝若干等于多少，看侬欢喜，海鲜味道若有若无勿可闻于肉汤中，顶好。

2026年第一天，阴冷，吃一碗简单又鲜美个热汤，让日脚适适意意。就像每年个维也纳新年音乐会，主料总是一成不变，但人家有一把老火哦。