2026年11月23日 星期一
一语建言新梯暖 东门变身成“仪门” 宜兴山里来个板栗 稻田里个露天电影 一张签名节目单
第15版:星期天夜光杯/上海闲话 2026-11-22

稻田里个露天电影

微信扫码看视频听钱程沪语朗读

◆王 洪

秋风一吹,稻浪沙沙响,闵行颛桥镇农业合作社个田头,放起了一场特别个露天电影。

“稻浪寻秋,重阳拾遗”,今朝村里向男男女女、老老少少,侪跑到合作社稻田边浪,寻觅老早看露天电影个味道。

天慢慢叫暗下来,远处一排排楼房就是城里个样子,金灿灿个稻穗一眼望勿到头。城里向个喧闹拨迭块稻田一隔,一下子就安静起来,蛮适意。银幕稳稳当当立起来,折叠椅子一排排摆得齐齐整整,等村民过来坐。老老少少陆陆续续赶得来,有搀牢长辈个小囡,有搭伴一道来个年轻人,还有附近小区特地跑过来个老街坊。大家寻好位置坐定,叽叽喳喳茄山河,空气里向侪是稻谷清香个气味。

老早子,露天电影是乡下头最闹猛个大事体。只要放电影个消息一传出去,大家就端仔小矮凳提早跑过来抢位置。村民凑辣辣一道,一边吃着瓜子一边评头论足。现在电影院里看电影个环境越来越好了,不过迭种辣辣农田里看电影个味道,放映厅里是寻勿着个。

等天色完全黑透,放映机一亮,画面跳上银幕,稻田里向一下子静下来。今朝放个是《飞驰人生3》。迭个辰光,风吹过稻田发出沙沙声,搭电影里个声响混辣辣一道,温柔得勿得了。看到电影里动人个情节,有人举起手机,亮起屏幕,点点微光汇聚辣辣一道,像稻田里亮起一大片小星星。大家跟仔光影一道拍手、感叹,气氛既闹猛又暖心。刘阿婆一边看一边讲:“几十年呒没迭能辣辣田埂浪看电影了,老底子只要放电影,村里所有个人侪会跑过来。今朝再体验一趟,真个开心啊!”旁边个年轻人也讲:“平常上班忙忙碌碌,难得到稻田里吹吹秋风,看看电影,心里向一下子就放松下来。”

重阳辰光,迭场稻田里个电影,勿单单是看一部片子,更是寻回记忆里个烟火气。一边是丰收个田园风光,一边是近郊邻里个温情相聚,拿农耕味道、重阳暖意搭老上海怀旧滋味捏辣辣一道。

夜风拂过稻浪,银幕上光影流转。城市发展得越来越快,交关老场景慢慢叫少见了。像迭种扎根田间地头个活动,拿乡土味道留牢,让住辣辣钢筋水泥大楼里个老街坊,出来踏踏泥土,吹吹田野里个风,辣辣稻花香里一道白相一道开心。

散场个辰光,大家还有点勿舍得,走一路讲一路。稻穗辣辣晚风里轻轻摇晃,今朝夜里迭一场露天电影会一直留辣辣大家个心里,暖乎乎个。

放大

缩小

上一版

下一版

读报纸首页