◆ 钱红春
阿拉小区一共有四十多部电梯,现在侪到使用年限,要分批次换新电梯。我住个搿幢楼,新电梯已经装好投入使用。新电梯比老个亮堂、宽敞,乘上去适意交关,大家侪讲好。最让我开心个是,我提个一条建议,还被采纳落实了。
小区原先个电梯,轿厢里向侪是不锈钢墙面,呒没扶手。廿多年乘下来,虽然平时勿觉着有啥勿方便,也呒没出过大事体,但小毛病经常有。有天夜里,我乘电梯准备出去买物事,门刚刚关脱,正要往下开,轿厢突然震动起来。里向呒没扶手,我吓得一记头靠牢墙壁,蹲下来。还算好,虚惊一场,一歇歇就恢复正常了。后来晓得,同楼邻居也碰到过搿种情况。搿趟换电梯,楼里每户人家侪要出眼钞票,老早电梯毛病太多,三日两头要修,维修基金已经用光了。
我自家年纪大了,走路本来就勿大稳,时时刻刻要当心掼跤。每次出门,老伴总要从屋里关照到电梯口:“路浪看仔细,覅跌跤。”再讲小区里老人越来越多,有个走路摇摇晃晃,有个离勿开拐杖,还有个走几步就要歇一歇,所以乘电梯更加要当心。结合自家个亲身经历,我就想趁搿趟更新电梯,辣轿厢里装扶手,让大家乘得更加安心。
有趟我路过居委会门口,正好碰着一位居委干部踏脚踏车出去办事体,我马上喊牢伊,三言两语搭伊讲了我个想法。伊噢了一声,骑车子就走了。我想想自家就是个普通退休老人,讲闲话呒啥分量,人家未必听得进去,所以讲完也呒没抱啥希望。况且,老早电梯一直呒没扶手,介许多年也呒没出大事故,装勿装好像无所谓。再加当时施工方案已经定好了,新电梯也已经运到小区,工程队马上就要开工。就算建议再好,恐怕也是马后炮。
啥人晓得过了几天,搿位居委干部特地跑到我屋里来讲,伊当天就拿轿厢加装扶手个想法,向小区相关部门汇报。负责电梯更新个领导相当重视,马上召集人开会商量,再搭电梯厂家沟通,修改施工方案,采纳我个建议。听到搿个消息,我心里激动得勿得了。万万想勿到,我随口提个小建议,会得到介许多人重视。
我头一趟乘新电梯,手一直扶牢轿厢壁浪新装个扶手。倒勿是担心电梯勿稳,而是心里觉着格外踏实。