讲讲老早“拆纱头”

文/侯宝良

整理衣橱个辰光翻出了交关旧汗衫、坏脱个棉毛衫，捐出去勿像样，当揩布用也用勿脱，厾脱像啥是浪费。我自说自话讲：拨伊“拆纱头”？又拿件坏脱领圈、袖子个棉毛衫齐胸剪脱，缝好一头讲：“拿拆下来个回丝塞进去做只靠垫芯也勿错嘛。”老妻讲，现在啥人还“拆纱头”？我讲拆就随手拆起来，还讲起老早厂里还有人勿舍得用迭种“好回丝”揩机器。

记得埃歇辰光社会浪有专门机构收购针织厂、色织厂成衣裁剪下来勿好再用个边角料，批拨里弄服务站，服务站再分配拨有生活困难个人家，让伊拉手工拆成一团团纱线，再交回服务站经质检后按量计价，伊拉回收了再卖拨工厂。搿种纱线团就是回丝，辣厂里可以用来揩机器设备，辣屋里可以当抹布揩台子凳子。

讲起“拆纱头”搿种手工生活，虽然赚头勿大，但好坏也算一种福利性个赚钱途径，可以补贴家用，又勿需要啥技能，老老小小侪好做。再讲埃歇辰光邻舍道里就欢喜碰拉一道茄山河，乃末正好帮忙拆，屋里个小人嘛做完功课也来拆。大家坐辣一道，家长里短，南腔北调，嘴巴勿停、手里勿闲，一歇歇工夫就拆好一大堆。

“纱头”有两种：一种是汗衫、棉毛衫个边角料，搿种纱线细洁，算是“好回丝”；还有一种是从厚绒衣裤或者色织料拆下来个，各种颜色、质地个纱线混辣一道，品相就差了一点，阿拉叫伊“烂糊回丝”或者“粗回丝”。从前我辣工厂上班，到车间仓库里领回丝个票据也分成两种，一种可以领“好回丝”，一种可以领“粗回丝”。

因为各种纺织品个织法勿同，“拆纱头”当然有“好拆”、“难拆”之分，平针织法就好拆，寻到一根纱头拉出来，就可以一拉到底。难拆就要勿断寻纱头，而且还拉勿出长纱线，弄得心里老齁势个。阿拉读小学个辰光，每个礼拜侪有劳动课，常常有“拆纱头”个生活。门槛精个张强就专门拣好拆个面料，拆得快，常常得到老师个表扬。其实伊拉屋里是“拆纱头”专业户，经验丰富呀。

想想勿管“拆纱头”还是其他外包工家庭个子女，伊拉个劳动观念侪要比经济条件富裕家庭个子女强，张强屋里是困难户，拆纱头就是伊拉个课外生活。伊后来自豪讲，伊拉兄妹几个就是靠“拆纱头”赚零用钿个。为了拆得快、拆得好，伊还开动脑筋，搞了勿少小创意小工具。

讲到搿搭，我手里个几件旧汗衫也已经拨拆成一大堆回丝了。看看搿堆回丝，心里蛮有成就感，讲：“老婆，侬看看交，阿拉讲讲闲话、拆拆纱头，倒也拆仔一大堆了，做一只靠垫绰绰有余了。”