酸酸甜甜锅包肉

文并图/沈一珠

迭只菜一听名字就晓得勿是上海菜，不过，觉着交关上海人侪欢喜，因为伊也是酸酸甜甜嗰。

上海人有交关家常小菜也是迭种味道，像咕咾肉、糖醋小排，烧法也差勿多，侪是肉先浆好，裹一层湿淀粉，油里炸透仔，再着一层糖醋泥辣外头。

迭只菜顶早是一个同事带阿拉去吃着嗰。同事一家门从哈尔滨到上海，尽管语调里有明显东北口音，偏生伊讲闲话、做事体倒是温柔细巧、软糯服帖，南方得一塌糊涂。后来熟了，一问，人家外婆家就是辣江南水乡嗰，怪勿得。

从前我辣汉口路附近上班，开始，阿拉按阿拉个习惯，常常带伊去吃三黄鸡、鸡粥、鸡汤面；要么就是菜肉馄饨、生煎馒头；后来，阿拉就拨伊带到东北小馆子里去吃地三鲜、锅包肉咾啥。老实讲，后来，三黄鸡侪勿大去吃了。当然，也是因为东北小馆离单位更加近一眼。

所以讲，吃物事习惯迭种东西，常常也是呒啥节操好讲嗰，抖一抖，落一地。有滋有味才是硬道理。

锅包肉个材料比较简单：里脊肉200克左右，葱、姜、蒜各少许。调料包括盐、糖、生抽、老醋、黄酒、油、生粉各少许。做个辰光，先拿猪肉汏清爽，沥干，切成薄片，用盐、黄酒腌一歇；再拿生粉200克左右，加适量水，拌得稍微厚一眼，肉片摆进去，同时加少许油，让生粉浆全部裹牢肉片。

油镬里多倒点油，烧到六七成热，拿肉片轻轻交摆下去，氽成形后撩出来；油再烧到六七成热，成形个肉片再摆下去，炸到金黄颜色就好出锅了。

接下来，用小碗调盐、醋、糖、生抽汁备用，糖搭仔醋可以多一眼。油镬里留一点油，葱、姜、蒜摆下去煸香，再拿糖醋汁倒下去，烧到汁水黏稠，金黄色个肉片倒下去，拌匀，就可以出锅上桌了。