情系南昌路

文/冯济民

南昌路是上海有名的淮海中路南面的一条马路。我搭南昌路有缘，有感情。因为从1950年到1976年，我曾经勒南昌路生活了26年。搿搭有我童年、少年、青年时代交关难忘的记忆。

我屋里原来住勒南市小南门黄家路，1950年搬到南昌路靠雁荡路口的福寿坊。迭是建于上世纪30年代的新式里弄房子，有浴缸和抽水马桶。记得南昌路当时叫环龙路，雁荡路当时叫华龙路。小辰光姆妈带我出去，回来叫三轮车的辰光总归讲，到环龙路、华龙路。车夫一听就晓得了。

福寿坊对面是复兴公园后门口，搿搭是一个十字路口，一直邪气闹猛。弄堂门口有大饼摊、铜匠摊、修脚踏车摊、皮匠摊。

朝东路口是黄炎培办的中华职业教育社。门口有只书报摊。摊主是个女人，伊男人是邮局职工，批发眼书报杂志勒此地卖卖。我小辰光看的《小朋友》《儿童时代》《少年文艺》老啥侪是勒迭个摊浪买的。买得多了，姆妈搭女摊主成了熟人，一直相处了几十年，迭是后话。中华职业教育社对面路口有一个罗宋汤面包摊。女摊主高鼻梁好像有点外国血统，伊通常穿一件带花边的白围单，做的罗宋汤又红又浓，搭罗宋面包一道吃邪气可口。再朝东走几步就是大同幼稚园。当年是卢湾区第二中心小学。我小学一年级就是勒搿搭读的。

当年，复兴公园门口东面是一长排点心摊，大饼油条、粢饭、豆浆、馄饨、面条、汤团、老虎脚爪应有尽有，从早开到夜。附近居民的早点心搭夜宵侪照伊牌头。点心摊对面是各种各样小摊头，卖零食、套圈圈、打汽枪、打康乐球、打弹子五花八门，也是阿拉搿点小囡最欢喜去的地方。

出福寿坊朝西走，北面是民居，上海别墅、花园别墅、志丰里等侪是中高档新式里弄。只有离福寿坊勿远的南昌路100弄老渔洋里是石库门房子，里向有当年陈独秀办的《新青年》编辑部。

志丰里再朝西，过了思南路的第一个弄堂里，有我当年上的南昌路第三幼儿园。至今我还保存有当时的成绩单。幼儿园弄堂朝西有一家眼病防治所，对面有家“华外集邮社”。记得老板胖胖的，嘴巴里经常叼支雪茄。我小辰光集邮常常去买邮票。

福寿坊对面一长排墙是原来的法国学堂，后来改为科学会堂。我爸爸是科技协会会员，所以小辰光常常有机会进去白相。朝西是几幢连排花园小洋房，再过去就是当时的市少体校。

迭段南昌路浪的弄堂里差勿多侪有我的同学。自从1957年我就读的卢湾区第二中心小学搬到皋兰路后，我每天上学、放学侪要走搿段南昌路，一直到1961年小学毕业。当年，搿段南昌路邪气幽静，只有几爿烟纸店，也勿大有汽车开过。夏天浓密的梧桐树荫下邪气阴凉。

1976年我屋里从复兴公园后门搬到前门，还是经常到南昌路去。后来住到杨浦区，1999年又勒浦东买了房，从此远离南昌路。难板到浦西，有辰光也到南昌路走走。但搿搭到处破墙开店，路浪车水马龙，喧闹替代了昔日的幽静，让我有一种失落搭惆怅的感觉。

虽然离开南昌路已经四十多年了，但我勿会忘记自家从小住勒南昌路，是勒南昌路长大的。