弄堂游戏“打台球”

文/杨保飞

老底子我屋里住勒淮海路嵩山路附近一条叫做大安里个弄堂里，差勿多就是现在香港广场姐妹楼个位置。从我姆妈开始，总共勒大安里住勒七十几年，到20世纪90年代，动迁到梅陇。我个童年就是勒大安里度过嗰，有交关有趣个记忆。

埃歇辰光，学堂只上半天课，功课做好，就可以到弄堂里白相。女小囡一般欢喜跳橡皮筋，阿拉男小人就单脚跳白相斗鸡或者趴勒地浪打玻璃弹子。还有一种叫“造房子”个游戏，用粉笔辣路面石板浪写“1、2、3、4”，翘起一只脚，拿一块小石头从“1”开始一格一格踢过去，再踢回来。不过，我最欢喜个游戏是约几个小朋友一道打台球。阿拉当年讲个“打台球”其实就是“打乒乓”，勿是现在讲个“桌球”。覅讲一张合格个桌球台需要多少钞票，就是用个球杆也价值不菲，决勿是当年阿拉搿点弄堂里个小屁孩能白相得起嗰。

当时弄堂口左边有一家服装店，右边有一家雨衣店，伊拉个排门板侪堆放勒阿拉弄堂里。日里向搿点排门板是勿派用场嗰，正好拨阿拉用来搭乒乓球台。

从自家屋里搬四只一样高低个方凳，选三块整齐清爽个排门板，就可以搭起了一只简易乒乓球台，再寻两块砖头放勒当中，上面搁一根竹竿，台子就搭好了。

比赛开始，先是阿宝搭老黄对垒，我立辣当中做裁判。阿宝抽球结棍，老黄削球漂亮，两家头杀得难分难解。可惜，排门板拼起来难免有接缝，球落到接缝浪，再弹起来个方向就变得奇奇怪怪，难以预料。作为裁判，我连忙叫“暂停，搿只勿算”，重新来过。

阿宝三战两胜，老黄下台，立勒当中做裁判，换我上场。我个打球水平比伊拉两个人高一点，最后我是冠军，阿宝亚军，老黄季军，大家侪有名次，皆大欢喜！

光阴如飞，眼睛一眨，几十年过去了，现在回想起来仍旧清清爽爽，好像就发生了昨日。