冬天美味是鱼冻

文/费平

假使要问寒冬腊月啥个菜肴最好吃？我首选鱼冻。勿管是带鱼、黄鱼、刀鱼、青鱼、鲳鱼、鳊鱼、鲈鱼还是鲫鱼，汤卤冷却后个冻块，对我来讲侪是美味。

勒了炖煮鱼个辰光，鱼肉里向叫作胶原蛋白个蛋白质搭仔热水发生作用分解成动物明胶，常温或低温下就会变成鱼冻。吃完个红烧鱼，即使是清蒸鱼，搿个汤汁凝冻后如润脂丰膏，吃勒嘴巴里滑爽如饴。鱼本身个鲜，加上葱姜、酒、剁椒等佐料个混合，使鱼汤汁更加鲜美。而吃热鱼个辰光，鱼汤汁勿能尽享，只有冷却后形成鱼冻，其味鲜美无穷。寒冷个早浪向有鱼冻作伴，热腾腾个粥、泡饭搭仔鱼冻碰撞出个火花，点燃了内心个激情，勿吃得津津有味才怪呢！

欢喜吃鱼冻是缘于那个贫穷年代贫穷人家个贫穷生活。我成长于物资困乏年代，母亲重病在家休养，父亲是个码头工人，收入微薄，维持一家三口个生计捉襟见肘。我跟着勤俭持家个母亲，养成了勇于面对生活磨难个坚韧性格。埃歇辰光猪肉凭票供应，很少进门，吃鱼就是补充蛋白质个最佳选择。

记得我好几次向母亲埋怨阿拉屋里没荤菜吃，母亲说“鱼勿是属于荤菜吗？”闲话虽然有道理但总显得苦涩。

母亲舍勿得买大鱼，而是专门买一角几分一斤的小带鱼或小黄鱼。一碗红烧小鱼搭仔青菜汤常常是阿拉屋里个夜饭小菜。头天个鱼吃得差勿多了，剩下来个碎鱼块、鱼骨搭仔卤汁就自然凝冻，成了母亲搭仔我个早饭小菜。秋末初冬时节，就着鱼冻，喝着热乎乎个粥，身浪暖洋洋，心里多少惬意啊！为了避免有鱼骨刺，母亲常常让我吃上面个鱼冻，随着三碗粥进伊肚皮，母亲面前堆了一堆鱼骨鱼刺……

父亲看阿拉喜欢吃鱼冻，休息天还搭仔邻居去郊外河沟里拷浜捞鱼，经常带回来一小桶寸把长个小鱼，搿点小鱼就成了阿拉屋里几天个小菜，而鱼冻便成了母亲搭仔我大快朵颐个佳肴。有辰光为了勿显单调，母亲勒煮鱼个辰光还加些黄豆搭仔香菜，鱼冻里鱼香、豆香加上菜香，就更让我垂涎三尺了。

我九岁那年，母亲去世了，屋里买汏烧搭仔其他家务侪是我来做，煮鱼是我练习个第一门烧饭手艺。为了让鱼冻量多，一开始煮鱼个辰光我加了交关水，结果最好个汤水老难凝冻，即使结冻了也邪气嫩，勿像母亲做个鱼冻，可以用筷子搛起来！这使我领悟到，万事万物侪有伊存在个条件搭仔规律，勿能违背，人也勿能太贪心，否则得勿偿失！煮鱼放多少水有一定个比例，辅料多于主料，鱼肉中个胶原蛋白浓度勿够，鱼汤汁哪能会形成鱼冻呢？明白了搿个道理，以后煮鱼，做出来个鱼冻就搭母亲做个差勿多了。

现在，煮鱼吃鱼冻是阿拉屋里饭桌浪个快乐事体，妻子搭仔女儿勿管是海鱼还是河鱼，侪喜欢吃鱼冻。尤其是冬天，结实个鱼冻膏体细腻，伴着鱼肉一道入口，有种饕餮天下个感觉。妻子买回来个鱼侪是整条大鱼，我却时常买点小鱼来煮鱼冻，就是为缅怀逝去个父母，为个是追忆那清贫而又惬意的时光。鱼冻情结依旧，亲情滋味依旧，勒我个味蕾中永远勿会抹除。