想起当年学溜冰

微信扫码看视频听钱程沪语朗读

◆ 赵妃蓉

巴黎奥运会期间，看电视里奥运选手们比赛拼搏个画面，让我想起小辰光学溜冰个事体。

当时我刚刚读一年级，有一天早浪向，阿拉小朋友侪辣了操场浪做早操，外面来了两个老师，辣操场旁边东张西望，看阿拉做操，过仔几分钟就捺我搭仔另外两个小朋友叫出队伍。后来我才晓得伊拉是市溜冰队个教练，来阿拉学堂挑学员，我被选上个主要原因应该是我从小长得比较高，体格也比较健硕。

现在上海大剧院个位置，埃歇辰光是上海市体育宫，简称“市体宫”。当天放学以后，阿拉就到市体宫报到。市体宫里有一大一小两只溜冰场，阿拉搿眼新学员就辣了小个溜冰场里上课。因为是被选出来嗰，当时心情斜气激动。教练讲规矩个辰光，我偷偷瞄两眼隔壁大溜冰场里训练个大姐姐大哥哥，看伊拉潇洒流畅个动作，眼红得勿得了，我也想马上能够像伊拉一样辣溜冰场浪飞驰。

埃歇辰光练个是溜旱冰，溜冰鞋底有四个轮盘，用两根粗个带子像绞花棒一样绑勒了鞋子浪，感觉好像也蛮安全嗰。溜冰场四周围有一圈铁制个圆形扶手，第一趟训练，老师教阿拉重心放辣一只脚浪，另外一只脚抬起来往前走一步，再调整重心，换一只脚往前迈步。呒没想到，听上去简单个动作到了自家做个辰光完全做勿到。我刚刚抬起左脚，右脚个四只轮盘就一滑，当场四脚朝天。掼倒了，拉仔扶手立起来，再掼倒，再立起来。一场训练两个钟头，我因为控制勿好重心，基本呒没往前头走出几步，一直勒了掼跤。我永远勿会忘记第一天训练个挫折感，平生第一趟真切个感受到啥个叫“看人挑担勿吃力”，不过我呒没想过放弃，因为我忒想学会溜冰了。

小辰光记性好，忘记性也大，到了第二天放学，我又准时到了训练场地。讲起来也奇怪，有了前一天掼跤个经验，再穿上溜冰鞋，立勒了扶手旁边，就好像寻到了一点感觉。吃重心个脚用脚趾拇头去控制，同时脚尖稍稍朝里，就勿大会得滑倒了，可以捺步子迈得大一眼，往前走了。

再后来终于学会了溜冰，每趟训练辰光，当我放低身体重心，分开双腿，自由自在滑行个辰光，感受耳边吹过个风，感觉自家成了天空中飞翔个小鸟，真是老享受啊。还有比赛辰光个你追我赶特别让人着迷。每趟训练以后肌肉特别酸痛，但是超越自我个热情一直勒鼓励我勿断向前。又过了两年，因为学堂功课越来越多，我离开了溜冰队，但是参加溜冰队个经历磨炼了我个意志，让我受益终生。