弄堂乒乓通俗语

◆ 叶世荪

巴黎奥运会乒乓球比赛看得惊心动魄，每一场、每一分侪来之勿易。中国乒乓球个地位来自运动员个拼搏，也少勿脱包括“弄堂乓乓”在内个群众基础。

记得小辰光弄堂里搭块门板、搁根竹竿，学生子书包一掼，就可以拿起乓乓板大显身手了。埃歇辰光发球失误叫“请客球”，赛过侬请客白送拨对手一分。勿适应对方发个转球叫“吃转球”，后来“吃转球”升格为上海俗语，也简称为“吃转”，意思是被迷惑、被愚弄。还有一种“哑壳球”，就是打瘪或轧瘪个乒乓球，只要勿破、呒没裂缝，用开水烫一烫，就可以让球恢复，只勿过搿种烫过个球打起来声音有点闷。

如果打球双方水平悬殊，大比分赢球也有专门讲法。一盘下来一方一分也勿得，叫“吃零汤团”，和考试成绩为零是一样个叫法。让对方只得一分，叫：请伊吃“腰子汤”，腰、幺同音，“幺”就是一，借用“腰子”是为了配得上“吃、汤”。同样道理，对方只得两分，叫：请伊吃“年糕汤”，“年”上海话谐音“二”；对方只得三分，就是请伊吃“山芋汤”；得四分以上，虽然勿算值得夸耀个成绩，但是一般就勿吃“汤”了。搿次奥运会中国选手请对方吃过点啥个“汤”，大家可以回忆回忆。

看乒乓比赛最紧张个是结束辰光双方比分11：10。只赢一分勿算赢，一定要赢两分才算完结。搿种情况标准称谓是“盘末平局”，弄堂乒乓叫作“求斯混”，这是英语deuce one个音译。Deuce是平手个意思，deuce one就是打平得一分后需要继续比下去。另外一个弄堂乒乓赛常常听到个英语音译词是“隑脱”或“隑路”，来源于get away或get out，表示“出局、输脱”；讲“还有两只球伊就要隑路了”，意思是再打两只球后对手就会败下阵去。