鲜嫩清甜肉丝瓜

◆ 沈一珠

搿段辰光看电视，肯定离勿开巴黎奥运会。搿天正好看到乌克兰跳高“睡美人”跳出金牌个镜头，小姑娘立勒起跑线浪，嘴角一翘，像上台演出前个亮相……然后摆好功架，像踏牢鼓点一样起跑加速，最后就迭能飘过横杆了。

好像听解说员反复用“飘过去”迭个词。真像是飘啊，轻悠悠嗰，因为镜头里看勿到肌肉紧张，听勿出呼吸加粗，更加看勿见平常辰光吃辛吃苦个练习。

“睡美人”又是哪能来嗰？比赛现场，伊自家“飘”好，就钻进随身带个睡袋里，勒比赛场地一角，笃笃定定“睏”过去，一直轮到伊比赛，再笃悠悠“醒”过来。迭种“睏”与“醒”，肯定跟阿拉平常个理解勿一样，据伊自家讲——贴近地面个感觉让伊觉着适意，难板还会到海边看看蓝天白云，通过数数或深呼吸来解一解自家个紧张情绪。

看奥运会，看奥运采访，迭种细节真真让人服帖。

除脱看电视，就是乱翻书。翻个是好友海燕推荐个英国作家罗伯特·麦克法伦个“行走三部曲”。拣了第三本《古道》先看。作家是一位学者，除脱细腻个文学描绘，书里还有大量地质、植物、历史知识，没有相关知识储备，看起来蛮吃力，索价一心两用，边看电视边翻书，寻着欢喜个地方多看两眼。比方讲——迎面走过来一男一女，一匹马上骑一个小人，是当地农民，从100英里外走过来；伊拉停下来跟作者讲闲话，马低头啃冬天稀稀拉拉个草，男人松松交捏仔缰绳，女人笑盈盈嗰。男人讲，伊拉刚刚走完转山路，闲话里没有骄傲自得，只是平静陈述，带一种疲惫个快乐。

迭两个场面让人想到“松驰”迭个词，生活也好，比赛也好，迭种松驰感，看看平常，想做到真个老难。奥运会浪个“睡美人”能赢比赛也肯定跟伊个松弛有关。

11点左右，烧中饭。荤菜有白切羊肉，素菜只有一根看起来像迷你冬瓜个肉丝瓜。伊个外皮有点厚，刨脱，丝瓜肉切成薄薄个滚刀块，分两半备用。

从前个丝瓜容易变黑，所以炒之前要用盐捏一捏再焯水，否则，一盆丝瓜一歇歇就变得灰卜落托。而迭种肉丝瓜大概是改良过嗰，绵密厚实，几乎勿会变色，所以也就省脱暴盐、焯水个环节。用两只蛋加一半丝瓜、一把毛豆子烧一镬子毛豆子丝瓜蛋花汤，清清爽爽。

另外一半炒虾仁。虾仁事先处理清爽，用生粉、盐、料酒、胡椒粉浆一浆。先少量油烧到八成热，虾仁摆下去，炒到断生盛出来；再加少量油炒丝瓜，加点盐，翻炒到丝瓜变透明了，虾仁倒下去翻炒均匀就好。勿加水，勿勾芡，勿用多余调料，就用油与盐，保持丝瓜鲜嫩清甜个特征，顶好。