繁花丛中范师傅

娄一晨

真没想到，我的2023年年底是在追剧中度过的……更没想到，追的这部剧中居然出了一个范师傅……前两天，约了两个朋友吃饭。饭桌上的话题自然离不开时下最热门的《繁花》剧集。

A：娄啊，我看到侬最新一条微博来。侬真额天天勒嗨追《繁花》啊？真额介好看啊？

我：当然咯！侬我认得介许多年数，侬啥辰光看到我介起劲看一部连续剧？而且是每天候勒嗨看？我自家回忆上一趟拼命追连续剧大概还是看《24小时》，就是Jack Bauer，20年前头来……

B对A说：侬覅讲老娄，我搿两天也勒嗨看迭只《繁花》。灵额灵额，王家卫还是可以额，片子里厢一帮上海演员侪蛮灵额……

A又说：我看到预告片里厢讲连范志毅也蹲勒迭只片子里厢演了只角色？

我哈哈大笑：侬老兄问了正巧！搿两天正好出来了，演一个黄浦江边廊外贸仓库额小头头。轧劲了勿得了！

B也笑：是额呀！绝对是本色演出哦……一出场就凶了勿得了，骂山门喉咙响得来：“啥？组织部安排侬到此地来学习？”我看了穷笑……

我：哈哈哈，还要帮伊配音乐来，出场之前放了一段《运动员进行曲》！阿拉屋里厢女同志当时就问我：哪能王家卫连迭个音乐也配到片子里厢去啦？第二只镜头阿毅就昂了肩胛跑出来了……

A：阿拉国内像范志毅迭能额运动员来拍电影电视剧多吗？

B：我好像记得徐峥额老婆老早是运动员？

我：哈哈哈，侬老兄对娱乐圈蛮熟悉额吗？呒没错，陶虹最早是北京花样游泳队额，后头转行改做演员。还有当年一个邵兵，小辰光做过赛艇运动员，身材卖相侪蛮好额，拍了只片子叫啥名字……女主角是宁静……

B：对额对额，叫《红河谷》！

A：哈哈，我看出来了，倷两介头侪蛮八卦额！而且记性侪好头势啊……个么我又要问侬老娄来，侬啥辰光也去混只啥角色扮一扮？侬也好代表上海人上去讲两句上海闲话呃呀……

B也跟着起哄：哈哈哈，是呀是呀，老娄卖相也蛮好额……

我赶紧作揖：哎哎哎，侪是自家老兄弟，勿作兴额好伐？我老有自知之明额。我还是老老实实继续做我额生活，继续蹲了三更半夜里出动。讲讲球，哇啦哇啦喊两声，继续掿观众朋友吵醒。抬头一看，球又呒没进……

三人大笑……