天才630

娄一晨

本周一，夜里，老友S来电。话语里透着兴奋！

S：喂，娄兄啊，刚刚田径世界锦标赛额转播侬看了吗？瞎灵呀……男子撑杆跳，世界纪录又破脱了伊讲……6米30！结棍！

我：哦哟，我以为出啥事体了，原来侬老兄还关心世界田径锦标赛，可以呃……阿是一记头拨伊额瑞典小朋友吓着了是吗？

S大笑：哈哈哈，是额呀。我听央视解说讲迭个小鬼比当年个布勃卡还要吓人，最近几年一直勒嗨破纪录。实力太强来……今朝伊6米30掿金牌，比亚军成绩要高出来30厘米！

我：是呀，迭个小鬼真额是天才勿得了……我查过伊全部资料，从2020年2月第一趟破世界纪录开始，6米17，除脱当中疫情额两年，到现在一路破纪录就呒没停过。今年里厢就已经破了三趟来，2月、6月、8月。侬讲讲看状态吓人吗？

S：侬晓得吗，我刚刚一面看一面就了想，瑞典介小额国家，人口么也呒没多少，哪能弄出来迭能介一个天才选手？简直勿可思议……

我：迭个侬就勿晓得来……迭个小鬼杜普兰蒂斯，实际上是个美国小人，从小就是生了美国，小学中学大学侪是蹲了美国读出来呃。伊拉爷是美国人，娘是瑞典人。屋里厢就是体育世家。爷老头子自家就是撑杆跳运动员，最好成绩也到过5米80，娘是排球运动员还兼女子七项全能。

S：啊？小鬼居然还是个美国人？就是讲还好伊是代表瑞典队，否则假使代表美国队额闲话，最近几届奥运会世锦赛额金牌侪是美国队包脱了咯？

我大笑：哈哈哈，迭个侬想了太多来……人家小朋友2015年就代表瑞典参加世青赛来，一出来就掿金牌。当时辰光只有16岁。接下来参加所有国际比赛全部是代表瑞典，一直到现在。而且，小鬼上头还有个阿哥下头还有个阿妹，也是代表瑞典参加国际比赛，也是撑杆跳，但是成绩侪勿灵。一家门好白相吗？

S：我再问侬呀，侬觉着迭个小鬼还能掿世界纪录提高多少？我前头看转播伊跳过6米30额辰光身体位置比横杆高出蛮多呃……

我：嗯……迭个侬叫我哪能讲法？我记得当年布勃卡最后一个世界纪录是6米14，差勿多是31岁创造呃。杜普兰蒂斯现在是26岁，再跳一届奥运会是肯定呒没问题呃。关键是要看迭个小鬼是勿是还有想法、有动力继续提高！

S：嗯，有道理……