屋外有“年味”

文/秦来来

阿拉小辰光顶开心个事体就是过年。因为过年，可以穿新衣裳；可以拿压岁钿；可以吃好吃个物事；可以到亲眷屋里拜年拿红包；可以到城隍庙里去买白相干（玩具）。

勿过，要实现搿眼“小目标”，当然是要付出个。

首先要帮大人掸尘。春节前半个月，屋里就忙起来了，天花板、墙壁角、床底下，侪要辣大人个指挥下爬上爬下，打扫清爽。

接下来就是买年货。埃歇辰光菜场里个冻鸡、冻鸭、冻蛋、冻肉，侪要凭票购买，能买个数量少也就算了，关键是要想买到搿眼物事，还要老清老早去排队，去得晚了，就只能买到落脚货。所以早浪四五点钟，大人就喊阿拉起床，到小菜场排队。侬想想看，埃歇辰光阿拉只有十来岁，冬天早浪最欢喜赖床，要从热彤彤个被头筒里钻出来，真叫怨啊！

买好年货，辰光也就到了关键阶段——准备过年个吃食。

糯米只有过年辰光有供应，所以大部分家庭侪要磨水磨粉，包圆子（外地人叫汤团）。弄堂里向邻居屋里个一只石磨子吃香得勿得了。基本浪一个月前就要去登记、打招呼，由主人家来安排日脚，张家今朝用、李家明朝用……为了按时移交石磨，只要磨子搬到屋里，勿管辰光早晚，就是勿睏觉也要拿糯米磨好。为了赶进度，阿拉兄妹轮流上岗，一个人磨、一个人舀米。磨法磨法，手浪向木知木觉就磨出血泡了。顾勿得介许多，弄块绢头包一包继续磨。

到了小年夜，要炒长生果、香瓜子。阿拉屋里有一袋早就炒“熟”个黄沙，黄沙是用细筛子筛过个，粒子极细，第一次用个辰光，先用铁镬子里翻炒，炒到黄沙颜色变成灰黑色，就可以用来炒长生果了。炒个辰光要勿断翻动，炒好个长生果、香瓜子，要放到竹筛子里筛一筛，拿黄沙筛干净，然后等伊冷却，再装到铁皮饼干听里。接下来是做蛋饺。埃歇辰光菜场里供应冰蛋（去壳鸡蛋搅拌冷冻制成），化开来正好做蛋饺。

等到大年夜，下半天四点钟，阿拉大人就要拿汏清爽、揩干净个紫铜暖锅拿出来，烧木炭加热，等汤水烧开，拿准备好个蛋饺、肉圆、肉皮、线粉、菠菜、豆腐……亨八冷打全部摆下去。搿顿夜饭最煞克（过瘾），唔没限制，放开肚皮，吃到心满意足，再出去白相。

老早大家屋里侪呒没电视机，大年夜就是放放鞭炮，听听收音机，茄茄山河，一直到眼皮打相打，再去睏觉。第二天大年初一，眼睛张开，首先是伸手到枕头底下去摸压岁钿，多少勿关，拿到就开心了。床浪向爬起来，来勿及吃早饭，先到外头放炮仗。搿个就是阿拉小辰光个“年味”。

为啥讲现在“年味”少了，就是因为动手少了，乐趣也少了。葛末“年味”到啥地方去了呢？到“店”里去了，到屋外去了。搿两日各大商场、超市，从里到外侪是中国结、红灯笼、红绸带，还有就是各种迎新年打折促销个广告牌。货架浪向商品琳琅满目，柜台浪向年货堆积如山。

水磨粉，店里有现成个；蛋饺，店里有现成个；花生瓜子，店里有现成个；年夜饭，侪到饭店里去吃了，用勿着忙前忙后……

还有，侬到火车站、飞机场去看一看，南去个、北往个，带着未婚妻个、抱着小婴儿个、背着礼包袋个、排队等退票个……侪是为了赶回去，搭自己个亲人相聚，一道过年。此地，充满浓浓个年味。

屋外有“年味”！