杏仁桃酥

文/沈一珠

小辰光，阿拉新村门口有爿小店，店堂勿大，里向物事倒是蛮全。走进去，左面一排生甏头搭仔铅皮桶摆辣地浪，侪是零拷个酱油、老酒、菜油、豆油；当中横里个柜台浪，摆个是洋火、肥皂、草纸等日用品。

右面柜台浪个物事就让阿拉搿点馋痨胚馋吐水答答滴了：一分洋钿可以买几根陈皮条；三分洋钿可以买一包盐金枣……摆辣玻璃柜台里个点心更加吃价一眼：模子大一眼个是枕头面包，是学生春游秋游个标配；小巧一眼个是圆蛋糕搭仔鸡心蛋糕。比较洋气一眼个，应该就是杏仁桃酥了：直径七八厘米，上表面奶黄色，下表面颜色深一眼，当中有只圆心，从圆心朝外，是放射形个线条，长长短短，弯弯曲曲。

总记得小辰光吃桃酥，特别欢喜圆心当中个几粒瓜子肉或者杏仁片，运道好会有二三粒，碰着勿巧，只有一粒半粒；拿伊拉轻轻交剥下来，用两只手指头轻轻捏牢，一点一点，细细交咬进嘴巴里……

现在网浪有交关烤桃酥个配方，勿管是杏仁还是瓜子肉侪可以一把一把吃了，反倒是老底子个桃酥味道难寻了。