城隍庙个茶楼书场

文/秦来来

阿拉小辰光，城隍庙当时人侪称老城隍庙，是为了搭城外头连云路个新城隍庙加以区别。

记忆里，搿搭地方首先是有各种各样好吃个小吃，像鸡鸭血汤、面筋双档、鸽蛋圆子小笼包、宁波汤团蟹壳黄等等，侪是我欢喜吃嗰。其次搿搭买卖小商品个铺子也多，像钮头纽襻铜纽扣、刀枪棍棒野狐脸、文具书本铅笔刀，要啥有啥。有名气个老店多，本帮菜馆老饭店、素斋饭店松月楼、品茗悦情湖心亭、小笼馒头长兴楼，各种店招目勿暇接。最后，城隍庙周边还有一多，就是茶楼书场多。

我小辰光，阿爸每个礼拜天侪要带我到得意楼吃茶（北方人叫喝茶，上海人叫吃茶）。得意楼就是现在豫园正门进去个地方，好像有两层楼，楼浪吃茶个价钿要比楼下贵。讲是吃茶，实际浪向有交关人是来谈生意嗰。同时，茶楼里向除脱吃茶，还有交关点心供应。我欢喜去，主要就是点心吸引我。至于阿爸搭人家谈点啥我从来勿听，就算想听也听勿懂。

印象当中，尽管湖心亭离得勿远，但是阿爸是勿大去嗰。

除脱吃茶，阿爸还要带我听书；又是老闲话，书，是听大勿懂嗰，反而是书场里个各种小吃，对我个吸引力比较大。当然，之所以我后来欢喜听书，应该是埃歇辰光打下个基础。

城隍庙周边书场交关多，像现在豫园个最东面，就是靠安仁街，就有好几家书场，我只记得琼玉楼和红月书场。据老人讲，老早还有柴行厅、快活林等书场，可惜我呒没印象了。

开辣福佑路浪个东方书场应该是当时城隍庙周边规模最大个书场了，伊是从西藏中路广东路口个东方饭店迁过来嗰。1929年东方饭店开业以后，就辣饭店里向开设了书场、剧场，当年我采访袁雪芬先生个辰光，伊就搭我讲，当时昆剧“传字辈”个艺人，曾经辣东方饭店演出，伊经常抽空去看，因为，袁先生拿昆剧（还有话剧）当做越剧改革个二个“奶娘”。

新中国成立以后，东方饭店变成工人文化宫，东方书场一转、二转，落户到老城厢个福佑路和潘家弄口，又称新东方书场。当时来讲，搿家书场辣老城厢里还是可以嗰，座位有400多只，场地比较宽敞。每趟看到门口海报浪上有有名气个先生来说书，我总归会提早半个钟头到书场个边门，看说书先生进场。有点身价个先生，侪是乘三轮车来嗰。

勿过，阿拉爷娘听书蛮挑嗰，当时基本浪只听“人民团”（上海人民评弹团），偶尔也会去听长征评弹团，其他先生个书基本浪勿听。搿能一来，伊拉就经常要到城外头去，像仙乐书场、大华书场、静园书场，侪比较远，所以去个辰光总归要叫三轮车。后来屋里经济条件勿灵了，我也长大了，欢喜听长篇评书，经济浪搭勿够，只好去听“人民团”个中篇，一夜天结束。勿过闲话讲转来，当时一场中篇评弹，票价也要3角，对我搿种中学生来讲，也蛮结棍嗰。

再后来城隍庙里向个书场侪关脱了，只剩旧校场路个玉液春茶楼。搿只茶楼一楼只有一开间门面，里向还有一只老虎灶，走进走出勿是老便当，两楼倒是蛮宽敞，是一个三开间统间。勿过我从来勿去听书，因为一流个说书先生是勿来嗰；再讲，碰到热天，两楼个窗门全部打开，我立了下头照样听得清爽。一张书票省脱了！