吃粽子 编绳网

文/许德华

离端午节还有十天，各种味道个粽子已经是阿拉屋里餐桌浪个常客了。搿主要是因为小镇浪向新开了一家点心店，店里卖个粽子品种邪气多，比如有碱水白米粽、蛋黄鲜肉粽、豆沙粽、白米红枣粽、梅干菜肉粽等等，为了区分勿同个品种，粽子浪扎个棉绳也有红、黄、蓝、绿、白等交关颜色。

按品种各买两只，用蒸锅蒸一蒸，邪气好吃。看到从粽子浪解下来个五彩棉绳品质蛮好，勿想浪费，就用伊拉编了一个绳网。

记得小辰光个邻居侪是来自山南海北，各种风俗习惯蛮多，像“立夏”就有勿少大人辣早浪煮鸡蛋拨小囡吃，还用磅秤拨小囡称体重。阿拉差勿多大个女小囡欢喜结绳网，结好个网里放一只白煮蛋让弟弟妹妹挂辣头颈浪，所以也叫蛋网。大人看见了就会开心表扬阿拉：手巧，像姐姐个样子。

网是搿能编嗰：先弄根铅丝弯一个开口圆；再备好彩色线绳10根（单色个也可以），然后拿9根线放辣开口圆浪，每一根侪对折好打结。9根线绳再二二配对，隔一定长度，依次交叉，相互打结，勿断向下。最后，用第10根线（按头围留好长度）取代铅丝串好，网底端扎牢就完工了。

记得当年“立夏”搿天上半日，是阿拉搿点小朋友戴蛋网出风头个辰光，互相还要比较啥人网里个蛋大，譬如装了鹅蛋，又大又白，也有装青皮鸭蛋嗰，侪会让其他小朋友眼热。当然，也有网里装鸡蛋个小囡勿服帖，讲“鸡蛋比鹅蛋营养好”。

至于搿种习俗个由来？大人讲是老早传下来个规矩，可以让小人天热勿生痱子。搿歇看来是因为天气越来越热，交关人特别是小囡感觉浑身呒没力气，需要食补。另外，一年里个搿段辰光是鸡蛋丰收时节，花小铜钿补身体，皆大欢喜。

古人认为，鸡蛋圆圆溜溜，象征生活圆满，吃鸡蛋相当于祈祷夏日平安，经受“疰夏”个考验。中医认为，鸡蛋性平、补气虚，有安神养心个功能。当然，鸡蛋一天吃1～2只就足够了，吃多了人体勿能吸收。

时至今日，我结网依旧熟练，平常看到颜色漂亮个棉线就会收集起来，等有空了就拿出来，编几只五颜六色个小网拨小朋友白相。