欢喜夜报 欢喜上海闲话

文/侯宝良

从小欢喜看夜报，到今年，夜报复刊四十年，我也从读者变成了作者，经常写点“上海闲话”个小稿。大概算算，已经有五十几篇，倒也让我有了眼“小名气”。

去年重阳节前，我陪姆妈到徐家汇修理伊用个助听器。看秋高气爽，坐辣轮椅浪个老人家精神蛮好，趁辰光还早，阿拉两家头索性坐地铁一号线去动迁前个老地方——老西门白相相。

一号线地铁造得早，交关站厅里呒没垂直电梯，推轮椅进出勿大便当。听说美罗城商城边浪出口地方有部翻板升降电梯，要通过楼梯边个对讲器招呼工作人员来操作。我揿铃以后，一歇歇就走来一位中年人，用钥匙放开电动翻板，还帮我推轮椅。伊看我姆妈左胸别仔一只党徽，开口称赞：“吆，老太太还是共产党员嘛！”我姆妈朝伊笑笑，讲：“谢谢侬。”伊又回头问我：“老人家也是本地人呀，今年高寿？”我脱下一半口罩回答：“95岁了。”伊看我两眼，脱口一句：“先生是侯宝良老师？”我有眼莫名其妙，问：“咦，侬哪能认得我？”伊讲常常辣网络浪看到我写拨夜报个上海闲话文章，因为转发个公众号里有我个照片。看多了就有点面熟陌生。看伊有眼兴奋，弄得我倒有点难为情。

走到服务口，伊还向其他同事介绍：“老王，搿位就是我经常讲起个侯宝良老师，今朝拨我碰着了，看看伊拉姆妈95岁，老太太还是个老党员。”迭位老王同志来上海廿多年了，现在上海闲话讲得蛮赞，根本听勿出原来个外地口音。伊讲：“阿拉两家头侪邪气要听上海闲话个故事，屋里小人也侪会讲上海闲话。侯老师侬文章里侪是讲老上海生活方面个事体，像《老早子茶馆店》《好白相个糖纸头》《邻舍道里称呼》还有做月饼咾啥，侪蛮有意思嗰”。我呒没想到，搿排登辣夜报浪个小文章会拨伊拉记得介牢。

最后伊拉还邪气风趣个对我姆妈讲：“谢谢老太太哦，要勿是侬轮椅来，阿拉哪能有机会碰着侯老师呢？”