老早仔个南昌路

文/冯济民

勒上海有名个淮海中路南面，有一条幽静个马路名叫南昌路。南昌路包括租界时代个陶而斐司路和环龙路。陶而斐司路1902年辟筑，是现在重庆南路到雁荡路个一小段路。环龙路是雁荡路以西个南昌路大部分路段，1912年辟筑。葛末伊为啥会叫环龙路呢？且听我慢慢讲来。

先讲讲环龙迭个人。环龙是一个法国飞行员。1911年，伊应邀来上海作商业性飞行表演。伊搭乘轮船来到上海，带来两架“山麻式”单引擎飞机，一架单翼机，一架双翼机。按照计划，飞行表演安排勒5月6日。对当时个中国来讲，呒没多少人看到过飞机，所以听说有飞行表演，上海市民侪翘首以待。

到了飞行表演搿天，天气晴朗。上海万人空巷，大家侪来看稀奇。环龙驾驶着山麻式双翼飞机从江湾万国体育会跑马场起飞，直上蓝天。途经上海半个城区后抵达市中心静安寺路（今南京西路）个跑马厅（今人民公园和人民广场）。突然飞机勒空中盘旋个辰光熄火。按常规环龙可以弃机自救，但是伊看到下面方圆一公里个地方侪是仰首观望个人群，弃机可能造成数百人伤亡，于是伊尽力拿飞机迫降到跑马厅个中央空地，结果机毁人亡。

当时，上海各报侪接连几天报道环龙飞机失事个消息，高度赞扬伊牺牲自家保护民众个做法，呼吁集资为伊筹建纪念设施，规模大小看筹得资金多少而定。到了第二年，顾家宅公园（今复兴公园）北部建起一座环龙纪念碑。纪念碑顶部有一架飞机模型，正面镌有法国诗人埃德蒙·罗斯坦德写个法文诗。当局还决定拿顾家宅公园北面新辟个一条小路，命名为“环龙路”（今南昌路）。搿就是现在个南昌路最初叫环龙路个来历。

抗战时期，环龙纪念碑拨拆脱了。我姆妈曾经勒环龙纪念碑前头拍过照，当时伊大约17岁，是1938年。从照片浪可以看到碑顶有飞机模型。迭张照片是一个纪念，也有一定史料价值。