烧一锅清汤南瓜

文并图/沈一珠

姆妈隔壁头，侪是中华好邻居。前两日去看伊，有人送来三只红洋葱搭仔几只白萝卜。再前头两日去看伊，有人送来一只日本南瓜，圆个，矮个，墨绿色个。搿种南瓜现在辣国内交关地方侪有种。侪是秋天里个好吃小菜。孵勒老公房里，姆妈勿肯搬地方，就是舍勿得迭眼热心热肺个老邻居；几十年了，生活当中各种牵丝攀藤，侪变成了难以描绘个幸福感了。

搿天一只南瓜，就用简单粗暴个办法处理了：一切两半，一半冷藏，一半再改刀成比麻将牌大点个块，油里煸煸；半斤多点猪软排，焯好水，一荤一素两样物事摆勒一道，笃一镬子吃口肥糯个汤。姆妈讲，中浪一顿，夜里一顿，伊吃了一天，老好吃。

齐巧看到一本《蔬菜教室》，一个叫内田悟个日本爷叔一只蔬菜店开了30年，之后伊又开了一间蔬菜教室，一个号头一堂课，教人家哪能按时令处理、烹饪蔬菜；居然，一只小办公室，满满当当坐足廿个人。爷叔索价拿讲义编成书，能仔细看下去，是觉着爷叔对蔬菜个态度老有意思：

要尽情享用应季蔬菜，就必须尊重蔬菜个生命。蔬菜也有“个性”，而且味道会随着切法与时间发生显著变化。有些蔬菜横切是一个味道，竖切又是一个味道。茄子勿适合冷藏，因为茄子原产于亚热带，特别怕冷。真是一个白相蔬菜个老爷叔。

书里有交关菜谱。比方讲，夏末初秋适合吃南瓜，“南瓜刚刚上市，上半只一个味道，下半只一个味道。因为下半只还处于生长状态，比较嫩；上半只已经成形，和熟透个南瓜差勿多”。

居然如此。先要对从前个粗暴处理讲一声抱歉；其实，横过来切一刀，上半部分偏熟，用来清蒸或者笃汤比较好；下半部分更加水灵鲜嫩一点，切片，油炒或者是煎炸更加好一眼。当然，一只南瓜买来，摆一两个号头之后，会全部熟透，迭个辰光，南瓜里个淀粉转化成糖分，水分也少了，口感变得软糯，适合做成金光灿灿个南瓜泥。

清汤南瓜做法：先准备高汤一碗，荤素侪可以；盐、生抽各适量。拿南瓜横切，取上半部分，勿去皮，切成容易入口个长方块；洋葱竖切，跟南瓜差勿多大小；蟹味菇或最新上市个赤松茸适量，整理成与南瓜差勿多大小。辣碗底先摆南瓜，再依次摆菌菇和洋葱，隔水蒸20分钟左右，到可以用筷子轻松戳进南瓜即可。再拿高汤加热，加适量盐、生抽调好味道，蒸好个南瓜等蔬菜浸入高汤，腌制一个小时就好。

迭个爷叔讲，浸入高汤腌制，摆一夜可能更加好吃。想想，迭个道理应该跟霉干菜烧肉一样，浸勒卤里辰光越长，味道越浓。