诗画里个古镇情

◆邵天骏

旧友相邀，到古镇上个一家老饭店相聚。

迭家顶着“老饭店”招牌个酒楼，有上下两层楼。除了有家常菜、小海鲜之类个特色菜，随处可见个字画，也是吸引顾客个一大特色。据介绍，迭点字画作品是从古镇浪向个知名诗社邀约来个，内容侪搭古镇有关。墙面浪还有交关古镇旧貌新颜个照片。

迭种身处在古镇地域风情里向，将古镇风貌“一股脑儿”包圆个生动场景，伊独特个文化创意，真叫人啧啧称赞。辣搿搭吃美食，看风景，寻觅诗情画意，真是别有一番乐趣。老饭店老板虽说勿是古镇人，不过伊一直生活辣古镇浪向，每天看着古镇个粉墙黛瓦、穿城个小河，还有地方浪向个一草一木，心里向早就存着把古镇风韵融进店面个想法。趁迭次装修个机会，终于如愿以偿，让形神兼备个古镇历史搭仔画面感，从此辣老饭店扎根。

环顾宽敞个饭店大堂，可以看到交关诗友个作品，其数量之多，看也看勿及。走进宽敞又典雅个包房，与文友一道驻足凝望，细细欣赏，完全忘记了来此聚餐个目的。里向有一首诗词，把古镇浪向个历史名人娓娓道来，为人杰地灵个古镇更添迷人风采。到老饭店里体验诗画里向个古镇情怀，文化内涵交关丰富，诗情画意成了岁月留下个顶好个点缀，诗人热爱家乡个浓浓情愫跃然而出，令人感动，吃个事体反倒变得勿重要了。

相约迭家老饭店，真是吃到嘴巴里，看到眼睛里，暖到心底里，收获老多个喜悦。真是一桩斜气惬意个事体呀！