天热了，吃碗黄鱼面

◆沈一珠

夏至已过，闷嗒嗒潮叽叽个日脚里，独想吃一碗鲜洁洁、爽爽气气个咸菜黄鱼面。

也是前两日去看电影引起个因头。收到电影家协会寄来个票子，就去轧了轧2025年上海国际电影节个闹猛。还真是轧着了，德国电影专场，《爱慕测验》，坐辣阿拉后排个是特地从德国飞来个女主演，讲，迭场是全球首映，所以伊特地到场；电影结束，伊还走上台举仔手机，跟所有观众一道合了个影，观众也斜气配合，双手举V字欢声笑语；毕竟，看好电影，演员像煞走出银幕跟观众合影迭种事体，也勿是经常有个。

电影场景几乎就是一幢海景别墅，一间摆满艺术品个客厅，一只露天游泳池……人物也就二男二女，辣迭眼地方走了坐，坐了走，讲长讲短；故事也蛮简单：一个有点年纪个有钞票男人，勿放心自家年轻漂亮个老婆，寻来了看上去有点纨绔个好朋友，横求竖求跪求，要伊去勾引自家老婆，试试女人对迭段让人抖抖豁豁个婚姻有多少深浅？顺便再探探口风，漂亮演员跟导演有多少暧昧？当然，测试有底线，千万不可弄假成真。

电影改编自陀思妥耶夫斯基个小说《永远个丈夫》和塞万提斯个中篇小说《埃斯特雷马杜拉个妒夫》，几个世纪之前就开始讨论个主题，现在还勒继续：友情与爱情个界线、男人个焦虑以及对女人个控制……也算是所有戏剧冲突里个基础配方。

搿天夜饭就到影院对面个金牌黄鱼面店，之前去吃过黄鱼馄饨，当时感觉有点咸，所以迭趟改吃咸菜黄鱼面；老好，面下得蛮硬扎，浓汤奶白，黄鱼片分量蛮足，又嫩又弹，一点点咸菜既吊出鲜头，又解了油腻。

想想，咸菜黄鱼好像也是个基础配方，多少年了，家常也好，宴席也好，总归压得牢阵脚。只不过，家常个黄鱼面有两种烧法，其中一种更加家常点：黄鱼整条汏清爽，油里煸一煸，淋黄酒，加热水烧到汤白，炒好个咸菜末、盐、胡椒粉一道摆进去，烧一滚，淘匀，撒葱花，盛到面汤里，下好个面摆进去就好。

另外一种烧法多点手脚，不过，更加接近金牌味道：黄鱼汏清爽，去鱼头去翅去鳞，摆平辣砧墩板上，两边鱼肉片下来，拆下来个鱼骨头鱼头沥干，跟葱姜一道，放到油里煸到金黄，加料酒去腥，加开水烧开，炖到汤白，加盐调好味道，过滤后，盛辣面汤碗里备用；片好个鱼肉用盐、白胡椒粉、生抽、葱姜水、一点点生粉，轻轻交捏匀，最后加点油拌一拌，腌半个钟头左右；葱姜水蛮要紧，鱼肉有水就嫩了；油也要紧，可以让每块鱼肉保持独立；咸菜可以买减盐个宁波咸菜，开袋即食；热锅冷油，腌好个黄鱼肉摆下去，划散，轻轻交炒到断生，马上盛出来，再炒，伊就要粉粉碎了。

最后，龙须面放到开水里一滚就好，盛到面汤碗里，依次加咸菜、鱼肉，如此，一碗鲜咸爽口个黄鱼面就大功告成了。