沪郊古镇石驳岸

◆福 华

沪郊古镇个河道，两岸一般侪有石驳岸。石驳岸个用场是挡住河道边浪向个泥土，等到我长大进了同济大学，才晓得迭个辣土木工程里向个专业名称叫挡土墙，还有辣石驳岸顶浪向再临河造房子个。石驳岸用大小、形状勿一样个石块或石条砌成，再用水泥砂浆填缝，形成石驳岸个“脸面”。从石驳岸可以看出水乡人家独特个生活状态。

石驳岸浪向常常嵌牢石栏杆、缆船石之类，迭些石块有特别个形状或者各种各样个雕刻图案，像葫芦、花瓶、如意咾啥。有些还兼有观察水位标志个用场，我老家前头一条河浜边浪个驳岸石头浪向雕了一只大闸蟹，农家个经验是，水位超过迭只大闸蟹，就可能要发洪水了。

造搿些石驳岸个能工巧匠叫石工。上世纪70年代初，我辣上海市政工程公司104工程队干了三年。搿个工程队个主要任务就是辣河道两岸造石驳岸、码头搭仔桥梁咾啥。当时我还是一个呒没结婚个小青年，搭来自南汇、奉贤个7位石工师傅（王才香、唐福元、蔡德善、邵海根、王忠贤、裴祖仁、唐福根）成了好朋友，向伊拉请教哪能做石工生活。

从山上开采运到工地个石块又大又重，形状奇奇怪怪。石工先要用大榔头拿伊拉敲开来，再用小榔头敲成适合砌筑个中小块，然后拿水泥砂浆来砌，再辣搿些石块个空隙当中灌浆，初步砌好个石墙浪个石块之间有横七竖八、或直或斜个缝。最后一道工艺叫勾缝，用小工具拿水泥砂浆填平石块之间个缝。搿些工作里向最关键个两道工艺是拿大石块敲成适合砌筑个小石块，搭仔最后个勾缝，伊拉决定了石驳岸个“脸面”灵勿灵。

好个石工既要力气大，又要心灵手巧，还要有点艺术鉴赏力。那些年，搿些石工朋友个朴实待人、乐观开朗和一丝不苟，让我学到了交关书本浪向学勿到个东西，真个是受益匪浅。